Oracle Fresh Layoffs: ఒరాకిల్‌లో మరోసారి ఉద్యోగాల కోతలు.. AI కోసం భారీగా ఖర్చు చేస్తున్న ఒరాకిల్.. అప్పుల భారం పెరగడంతో ఉద్యోగులపై ప్రభావం

Oracle Fresh Layoffs: టెక్ దిగ్గజం ఒరాకిల్ (Oracle) మరో విడత భారీ ఉద్యోగాల కోతకు సిద్ధమవుతోంది. ఆర్టిఫిషియల్ ఇంటెలిజెన్స్ (AI) మౌలిక సదుపాయాల కల్పనపై భారీగా పెట్టుబడులు పెట్టడం.. అదే సమయంలో పేరోల్ (జీతాల) ఖర్చులను నియంత్రించుకోవడంలో భాగంగా ఈ నిర్ణయం తీసుకున్నట్లు బిజినెస్ ఇన్‌సైడర్ నివేదిక వెల్లడించింది.

నివేదిక ప్రకారం ప్రణాళికాబద్ధంగా చేపట్టే ఈ తొలగింపుల్లో తొలగించాల్సిన ఉద్యోగులను గుర్తించాలని కంపెనీ ఇప్పటికే మేనేజర్లను ఆదేశించింది. ఒరాకిల్ రెండవ ఆర్థిక త్రైమాసికం ప్రారంభమయ్యే సెప్టెంబర్ 1 కంటే ముందే ఈ లేఆఫ్స్ అమల్లోకి రానున్నాయి. వీటిలో కొన్ని ప్రత్యేక బృందాల్లో రెండంకెల శాతం వరకు సిబ్బందిపై వేటు పడే అవకాశం ఉన్నట్లు తెలుస్తోంది.

టాటా సన్స్‌ చైర్మన్‌ పదవికి చంద్రశేఖరన్‌ రాజీనామా.. వచ్చే కొత్త సారథి ముందు ఎన్నో సవాళ్లు..

ఈ ఏడాది ప్రారంభంలోనే ఒరాకిల్ భారీగా ఉద్యోగులను తొలగించింది. 2026 ఆర్థిక సంవత్సరంలో కంపెనీ సుమారు 21 వేల మంది సిబ్బందిని (మొత్తం ఉద్యోగులలో 13%) తగ్గించుకోవడంతో ప్రస్తుతం వారి సిబ్బంది సంఖ్య దాదాపు 1,41,000కు చేరుకుంది. తాజాగా ప్రచురితమైన రాయిటర్స్ కథనం ప్రకారం.. 2026 ఆర్థిక సంవత్సరంలో ఒరాకిల్ ఉద్యోగ విరమణ పరిహారాలు (severance costs), పునర్నిర్మాణ వ్యయం కోసం ఏకంగా 1.84 బిలియన్ డాలర్లు వెచ్చించింది. గత ఆర్థిక సంవత్సరంలోని 374 మిలియన్ డాలర్లతో పోలిస్తే ఇది భారీ పెరుగుదల కావడం గమనార్హం.

మరోవైపు ఏఐ మార్కెట్‌లో తన స్థానాన్ని మరింత బలోపేతం చేసుకునేందుకు కంపెనీ బిలియన్ల కొద్దీ డాలర్లను ఖర్చు చేస్తోంది. 2026 ఆర్థిక సంవత్సరంలో ఒరాకిల్ ఏఐ మౌలిక సదుపాయాలపై 55.7 బిలియన్ డాలర్లు వెచ్చించడమే కాకుండా.. ఈ పెట్టుబడుల కోసం 43 బిలియన్ డాలర్ల రుణాన్ని కూడా సమీకరించింది. ప్రస్తుత ఆర్థిక సంవత్సరంలో రుణాలు, ఈక్విటీల ద్వారా మరొక 40 బిలియన్ డాలర్లను సేకరించేందుకు ప్రణాళికలు రచిస్తోంది.

ఏఐ కంప్యూటింగ్ సామర్థ్యానికి విపరీతంగా డిమాండ్ పెరుగుతుండటంతో ఒరాకిల్ క్లౌడ్ సేవల ఆదాయం గణనీయంగా పెరిగినప్పటికీ, మౌలిక సదుపాయాల కోసం చేస్తున్న అపరిమిత వ్యయం పెట్టుబడిదారులలో ఆందోళనకు దారితీసింది. దీని ప్రభావంతో ఈ ఏడాది ఒరాకిల్ షేర్లు గణనీయంగా పడిపోయాయి. కాగా, ఈ తాజా లేఆఫ్ వార్తలపై ఒరాకిల్ యాజమాన్యం గానీ, ఉన్నతాధికారులు గానీ ఇప్పటివరకు అధికారిక ప్రకటన విడుదల చేయలేదు.

(The above story first appeared on LatestLY on Aug 12, 2026 02:42 PM IST. For more news and updates on politics, world, sports, entertainment and lifestyle, log on to our website latestly.com).