Amazon Cargo Plane Crash Video: అమెజాన్ కార్గో విమాన ఘోర ప్రమాదం వీడియో ఇదిగో.. వాహనాలను ఢీకొట్టి మంటల్లో చిక్కుకున్న బోయింగ్ 767-300

Amazon Cargo Plane Crash Video: అమెరికాలోని ఫ్లోరిడా రాష్ట్రంలో ఉన్న మియామి అంతర్జాతీయ విమానాశ్రయంలో ఆదివారం మధ్యాహ్నం వేళ ఘోర విమాన ప్రమాదం సంభవించింది. అమేజాన్ ప్రైమ్ ఎయిర్ సంస్థకు చెందిన ‘బోయింగ్ 767-300’ కార్గో విమానం ల్యాండింగ్ సమయంలో వేగాన్ని అదుపు చేయలేక రన్‌వే దాటుకుని పక్కకు దూసుకెళ్లింది. ఈ క్రమంలో విమానాశ్రయ ప్రాంగణం వెలుపలి రహదారిపై ఉన్న పలు వాహనాలను తీవ్రంగా ఢీకొట్టి మంటల్లో చిక్కుకుంది. ఈ భయానక ఘటనలో ఐదుగురు అక్కడికక్కడే ప్రాణాలు కోల్పోగా.. మరో ఐదుగురు తీవ్రంగా గాయపడ్డారు. గాయపడిన వారిలో ముగ్గురి పరిస్థితి అత్యంత విషమంగా ఉన్నట్లు మియామి-డేడ్ కౌంటీ అధికారులు తెలిపారు.

‘21 ఎయిర్’ సంస్థ ద్వారా నడుస్తున్న 'ప్రైమ్ ఎయిర్ ఫ్లైట్ 7598' విమానం ప్యూర్టో రికోలోని శాన్ జువాన్ నుంచి మియామికి చేరుకుంది. స్థానిక సమయం ప్రకారం మధ్యాహ్నం 2 గంటల సమయంలో రన్‌వేపై ల్యాండ్ అవుతూ అదుపుతప్పిన ఈ విమానం, ఏకంగా రన్‌వే భద్రతా కంచెను తెంచుకుని పక్కనే ఉన్న రహదారి పైకి దూసుకెళ్లి రవాణా ట్రక్కులు, కార్లను బలంగా ఢీకొట్టింది. ప్రమాద తీవ్రతకు విమానం ఇంజన్ నుంచి భారీ ఎత్తున మంటలు వ్యాపించి దట్టమైన పొగ కమ్మేసింది. సమాచారం అందుకున్న వెంటనే మియామి అత్యవసర విభాగానికి చెందిన 60కి పైగా ఫైర్ ఇంజన్లు, దాదాపు 200 మంది రెస్క్యూ సిబ్బంది ఘటన స్థలానికి చేరుకుని సహాయక చర్యలు ప్రారంభించారు.

Amazon Cargo Plane Crash Video

🚨 Update: Deadly Cargo Plane Crash at Miami International Airport

At least five people have died and five others were injured after an Amazon Prime Air cargo aircraft overran the runway at Miami International Airport on Sunday afternoon, striking multiple vehicles and bursting… pic.twitter.com/6XLpT6mVaP

— FL360aero (@fl360aero) September 7, 2026

ఈ ప్రమాదంలో వాహనాల్లో ప్రయాణిస్తున్న పలువురు నలిగిపోయి చిక్కుకుపోగా, సాంకేతిక పరికరాల సాయంతో సిబ్బంది వారిని బయటకు తీశారు. విమానం కాక్‌పిట్‌లో చిక్కుకుపోయిన పైలట్, కో-పైలట్‌లను సైతం గాయాలతో సురక్షితంగా రక్షించినట్లు ఫైర్ చీఫ్ వెల్లడించారు. విమానం నుంచి ఇంధనం లీక్ అవుతుండటంతో అగ్నిమాపక సిబ్బంది తీవ్రంగా శ్రమించి మంటలను అదుపులోకి తెచ్చారు.

ఈ ప్రమాదం కారణంగా మియామి విమానాశ్రయంలో విమాన రాకపోకలను కొన్ని గంటల పాటు పూర్తిగా నిలిపివేసి 'గ్రౌండ్ స్టాప్' విధించారు. దీనివల్ల వందలాది సర్వీసులు తీవ్రంగా ఆలస్యమవ్వడమే కాకుండా పలు విమానాలను ఇతర ప్రాంతాలకు మళ్లించారు. ప్రమాదానికి గల ఖచ్చితమైన సాంకేతిక కారణాలు ఇంకా తెలియరాలేదని, ఘటనపై ఫెడరల్ ఏవియేషన్ అడ్మినిస్ట్రేషన్ (FAA) తో పాటు నేషనల్ ట్రాన్స్‌పోర్టేషన్ సేఫ్టీ బోర్డ్ (NTSB) ఉన్నత స్థాయి దర్యాప్తునకు ఆదేశించినట్లు అధికారులు తెలిపారు. ఈ విషాద ఘటనపై అమెజాన్ సంస్థ తీవ్ర దిగ్భ్రాంతి వ్యక్తం చేస్తూ, మృతుల కుటుంబాలకు సానుభూతి తెలిపింది మరియు దర్యాప్తునకు పూర్తిస్థాయిలో సహకరిస్తున్నట్లు ప్రకటించింది.

(The above story first appeared on LatestLY on Sep 07, 2026 09:35 AM IST. For more news and updates on politics, world, sports, entertainment and lifestyle, log on to our website latestly.com).