El Niño 2026: భారత్‌లో చలికాలంపై WMO కీలక హెచ్చరిక.. ఈ రోగాలు రాకుండా జాగ్రత్తపడాలని సూచన.. రికార్డు స్థాయికి ఎల్‌నినో దూసుకుపోతుండమే కారణం..

El Niño 2026: ప్రపంచవ్యాప్తంగా వాతావరణ సమతుల్యతను దెబ్బతీసే రీతిలో ఎల్ నినో (El Niño) శక్తివంతంగా బలపడుతున్న తరుణంలో, భారతదేశం తీవ్రమైన వర్షపాత లోటుతో రుతుపవనానంతర (శీతాకాల) కాలంలోకి ప్రవేశిస్తోంది. ఈ మేరకు ప్రపంచ వాతావరణ సంస్థ (WMO) తన తాజా వాతావరణ నివేదికను విడుదల చేసింది.

2026 అక్టోబర్-డిసెంబర్ మాసాల మధ్య పసిఫిక్ మహాసముద్రపు ఉపరితల ఉష్ణోగ్రతలు మునుపెన్నడూ లేని గరిష్ఠ స్థాయికి చేరుకుంటాయని, డిసెంబర్ నాటికి ఈ తీవ్రత తీవ్రరూపం దాల్చుతుందని డబ్ల్యూఎంఓ హెచ్చరించింది. మరోవైపు ఈ ఏడాది నైరుతి రుతుపవనాలు దేశంలో దీర్ఘకాలిక సగటు వర్షపాతంలో కేవలం 87.4 శాతం మాత్రమే కురిపించడంతో.. భారతీయ వ్యవసాయ రంగం, తాగునీటి నిల్వలు , భూగర్భ జల భద్రతపై తీవ్ర ఆందోళనలు వ్యక్తమవుతున్నాయి.

వాతావరణ విశ్లేషణల ప్రకారం పసిఫిక్ సముద్రంలో ఉష్ణోగ్రత వ్యత్యాసాలను కొలిచే 'నీనో 3.4' సూచిక తీవ్రమైన ఎత్తుకు చేరింది. 2026 జూన్‌లో సాధారణం కంటే 1.6 డిగ్రీల సెల్సియస్‌గా ఉన్న ఈ సూచిక, ఆగస్టు నాటికి 2.5 డిగ్రీలకు పెరిగి, డిసెంబర్ నాటికి ఏకంగా 3.7 డిగ్రీల అపూర్వ స్థాయికి చేరుకుంటుందని అంచనా వేస్తున్నారు. ఇది గతంలో 2015-16 మధ్య నమోదైన 2.6 డిగ్రీల చారిత్రక రికార్డును తలకిందులు చేయనుంది.   ప్రపంచ మహాసముద్రాలు ఎందుకు వేడెక్కుతున్నాయి.. ప్రతి సెకనుకు లక్ష హిరోషిమా అణుబాంబులు పేలితే విడుదలయ్యే అంత వేడితో సముద్రాలు..

ఈ ఎల్ నినో ప్రభావం 2027 ఫిబ్రవరి వరకు దాదాపు 100 శాతం నిలకడగా కొనసాగుతుందని, తద్వారా 1950 తర్వాత నమోదుకాబోతున్న అత్యంత బలమైన వాతావరణ ముప్పులలో ఒకటిగా నిలుస్తుందని డబ్ల్యూఎంఓ సెక్రటరీ జనరల్ సెలెస్ట్ సౌలో స్పష్టం చేశారు. ప్రపంచవ్యాప్తంగా ఉన్న 13 ప్రధాన వాతావరణ అంచనా కేంద్రాల సమగ్ర ఏకాభిప్రాయంతో ఈ వివరాలను వెల్లడించారు.

భారతదేశానికి సంబంధించి జూన్-సెప్టెంబర్ నైరుతి రుతుపవనాల కాలంలో సాధారణంగా కురవాల్సిన 868.6 మిల్లీమీటర్ల వర్షపాతానికి గాను కేవలం 759.4 మి.మీ మాత్రమే నమోదైంది. ఈ 12.6 శాతం వర్షపాత లోటు వల్ల దేశంలోని అనేక జలాశయాల్లో నీటి నిల్వలు అడుగుంటాయి. బలమైన ఎల్ నినో ప్రభావం వల్ల రాబోయే అక్టోబర్-డిసెంబర్ కాలంలో కూడా భారత ఉపఖండంలో సాధారణం కంటే తక్కువ వర్షపాతం నమోదు కానున్నట్లు అంచనా వేస్తున్నారు.

అయితే, దక్షిణ భారతదేశానికి, ముఖ్యంగా తమిళనాడు, ఆంధ్రప్రదేశ్ వంటి రాష్ట్రాలకు అత్యంత కీలకమైన ఈశాన్య రుతుపవనాలపై ఎల్ నినో చూపే ప్రభావం కొంత భిన్నంగా ఉంటుంది. అనుకూల హిందూ మహాసముద్ర ద్విధ్రువం (Positive IOD) అక్టోబర్‌లో గరిష్ఠంగా ఉండి కొంత ప్రతికూల ప్రభావాన్ని తగ్గించే అవకాశం ఉన్నప్పటికీ, ప్రాంతీయ పరిస్థితుల ఆధారంగానే తుది ప్రభావం ఉంటుందని భారత వాతావరణ శాఖ (IMD) తెలిపింది.

వర్షపాత లోటు , పెరిగే ఉష్ణోగ్రతల వల్ల రాబోయే రబీ (యాసంగి) సీజన్ పంటలకు అవసరమైన నేల తేమ తగ్గి, సాగునీటి డిమాండ్ విపరీతంగా పెరిగే ప్రమాదం ఉంది. జలాశయాల నీటి మట్టాలు పడిపోవడం వల్ల బాష్పీభవనం పెరిగి, తాగునీటి సరఫరాపై తీవ్ర ఒత్తిడి పడనుంది. వ్యవసాయంతో పాటు మానవ ఆరోగ్యంపై కూడా ఎల్ నినో తీవ్ర ప్రతికూల ప్రభావం చూపుతుందని ల్యాన్సెట్ (The Lancet) పత్రిక హెచ్చరించింది.

అంటువ్యాధులు, డీహైడ్రేషన్, వడదెబ్బ, పోషకాహార లోపం వంటి ఆరోగ్య సమస్యలను ఎదుర్కొనేందుకు వీలుగా ముందస్తు హెచ్చరిక వ్యవస్థలను, ఆరోగ్య రంగ మౌలిక వసతులను బలోపేతం చేసుకోవాలని నిపుణులు సూచిస్తున్నారు. ఎల్ నినో 2027 ఆరంభం వరకు కొనసాగనున్న నేపథ్యంలో, నీటి యాజమాన్య పద్ధతులు , ముందస్తు ప్రణాళికలతో సిద్ధపడటమే దేశం ముందున్న ఏకైక మార్గం.

(The above story first appeared on LatestLY on Oct 14, 2026 04:47 PM IST. For more news and updates on politics, world, sports, entertainment and lifestyle, log on to our website latestly.com).