AP BC Quota Case: ఏపీలో బీసీ రిజర్వేషన్లకు బ్రేక్.. హైకోర్టు తీర్పును సమర్థించిన సుప్రీంకోర్టు.. 34% బీసీ రిజర్వేషన్ల పిటిషన్ కొట్టివేత..
ఆంధ్రప్రదేశ్ ప్రభుత్వం స్థానిక సంస్థల ఎన్నికల్లో బీసీలకు 34 శాతం రిజర్వేషన్లు కల్పిస్తూ జారీ చేసిన జీవోలపై దాఖలైన పిటిషన్‌ను శుక్రవారం సుప్రీంకోర్టు కొట్టివేసింది.
AP BC Quota Case: ఆంధ్రప్రదేశ్ ప్రభుత్వం స్థానిక సంస్థల ఎన్నికల్లో బీసీలకు 34 శాతం రిజర్వేషన్లు కల్పిస్తూ జారీ చేసిన జీవోలపై దాఖలైన పిటిషన్‌ను శుక్రవారం సుప్రీంకోర్టు కొట్టివేసింది. గతంలో ఏపీ హైకోర్టు ఈ జీవోలను రద్దు చేస్తూ ఇచ్చిన తీర్పును సవాల్ చేస్తూ రాష్ట్ర ప్రభుత్వం దాఖలు చేసిన ప్రత్యేక సెలవు పిటిషన్ (SLP) పై విచారణ చేపట్టిన అత్యున్నత న్యాయస్థానం, ప్రభుత్వ వాదనలను తోసిపుచ్చుతూ పిటిషన్‌ను డిస్మిస్ చేసింది. దీంతో స్థానిక సంస్థలలో 34 శాతం బీసీ రిజర్వేషన్ల అమలుపై రాష్ట్ర ప్రభుత్వం పెట్టుకున్న ఆశలు అడియాసలయ్యాయి.
గ్రామ పంచాయతీలు, మండల పరిషత్‌లు, జిల్లా పరిషత్‌లతో పాటు పట్టణ స్థానిక సంస్థల్లో బీసీలకు 34 శాతం రిజర్వేషన్లు కల్పించేందుకు పంచాయతీరాజ్ శాఖ జీఓ 105, పురపాలక శాఖ జీఓ 1065లను ప్రభుత్వం జారీ చేసిన విషయం తెలిసిందే. అయితే ఎస్సీ, ఎస్టీ, బీసీ వర్గాలకు కలిపి మొత్తం రిజర్వేషన్లు 50 శాతం పరిమితి దాటకూడదన్న గత సుప్రీంకోర్టు మార్గదర్శకాలను ఇవి ఉల్లంఘిస్తున్నాయని పేర్కొంటూ హైకోర్టు వాటిని రద్దు చేసింది. దీనిపై జస్టిస్ దీపాంకర్ దత్తా, జస్టిస్ షీల్ నాగుల ధర్మాసనం ముందు ఏపీ ప్రభుత్వం వాదిస్తూ.. 2026లో చేపట్టిన కొత్త అధ్యయనాన్ని హైకోర్టు సరిగ్గా పరిగణనలోకి తీసుకోలేదని, అందువల్ల స్టే ఇవ్వాలని కోరింది. జీఎస్టీ కౌన్సిల్ సమావేశంలో తీసుకున్న పలు కీలక నిర్ణయాలు ఇవే.. జీఎస్టీ వ్యాపారులను అరెస్టు చేసే అధికారం రద్దు.. వస్తువుల డెలివరీపై రేటును 18% నుండి 5%కి తగ్గించే చర్యలు..
అయితే సుప్రీంకోర్టు ధర్మాసనం రాష్ట్ర ప్రభుత్వ సర్వే తీరును తీవ్రంగా తప్పుబట్టింది. కేవలం సమగ్ర కుటుంబ సర్వేను అధ్యయనంగా ఎలా పరిగణిస్తామని ప్రశ్నించిన న్యాయస్థానం, ప్రభుత్వం సేకరించిన గణాంకాలు ఎంతమాత్రం శాస్త్రీయంగా లేవని తేల్చి చెప్పింది. ఏపీ హైకోర్టు ఇచ్చిన తీర్పు అత్యంత సహేతుకంగా ఉందని స్పష్టం చేస్తూ సర్వోన్నత న్యాయస్థానం పిటిషన్‌ను డిస్మిస్ చేసింది.
సుప్రీంకోర్టు నిర్ణయంతో రాష్ట్రంలో స్థానిక సంస్థల ఎన్నికల నిర్వహణకు సర్వత్రా లైన్ క్లియర్ అయింది. హైకోర్టు గతంలో విధించిన ఆరు వారాల గడువులోగా ఎన్నికల ప్రక్రియను పూర్తి చేసేందుకు తాము సిద్ధంగా ఉన్నామని రాష్ట్ర ఎన్నికల సంఘం (EC) కోర్టుకు తెలిపింది. ఓటర్ల జాబితా ప్రత్యేక సమగ్ర సవరణ (SIR) ప్రక్రియ పూర్తయితే నూతన జాబితా ప్రకారం, లేనిపక్షంలో పాత జాబితా ఆధారంగా ఎన్నికల నోటిఫికేషన్ విడుదల సమయానికి ఉన్న జాబితాతోనే ఎన్నికలు నిర్వహిస్తామని ఈసీ ధర్మాసనానికి స్పష్టం చేసింది.
(The above story first appeared on LatestLY on Oct 09, 2026 12:07 PM IST. For more news and updates on politics, world, sports, entertainment and lifestyle, log on to our website latestly.com).
