QuickLY
Socially
Hyderabad, AUG 24: హైదరాబాద్‌లో అక్రమ నిర్మాణాల కూల్చివేతల (N Convention) వ్యవహారంపై డిప్యూటీ సీఎం భట్టి విక్రమార్క (Deputy Cm Bhatti Vikramarka) శనివారం స్పందించారు. హైదరాబాద్‌ అంటే లేక్స్‌, రాక్స్‌కు నెలవని.. వీటిని కాపాడుకోవాలంటూ పర్యావరణవేత్తలు పెద్ద ఎత్తున ఆందోళన చేశారని గుర్తు చేశారు. చెరువులను ఆక్రమించి నిర్మాణాలు చేయడం వల్ల ఇబ్బందులు కలుగుతున్నాయన్నారు. చెరువులు ఏవీ ఆక్రమణకు గురవకుండా పరిరక్షించడం కోసం ఏర్పాటు చేసిందే హైడ్రా (Hydra) అని తెలిపారు. హైడ్రాను ప్రజలందరూ ఆహ్వానిస్తున్నారని డిప్యూటీ సీఎం పేర్కొన్నారు. ప్రతి పనికి నోటీసులు ఇచ్చి ఆపై చర్యలు తీసుకుంటున్నామన్నారు. బఫర్‌ జోన్‌లో కాదు.. నేరుగా చెరువులోనే నిర్మాణాలు చేపట్టారని.. వాటిని కూల్చేస్తున్నారని భట్టి విక్రమార్క స్పష్టత ఇచ్చారు.
శాటిలైట్ ఫొటోల ద్వారా విభజనకు ముందు, విభజన తర్వాత పదేళ్లలో చెరువులు ఎంత మేరకు ఆక్రమణకు గురయ్యాయని తెలుసుకుంటున్నామన్నారు. రిమోట్‌ సెన్సింగ్‌ శాటిలైట్ ఫొటోలను తీసి, అంతకుముందు ఎన్ని చెరువులు ఉండేవి, ఇప్పుడు ఎన్ని ఉన్నాయి అన్నది ప్రజల ముందు పెడుతామన్నారు. చట్ట ప్రకారం, చట్టానికి లోబడి మాత్రమే చర్యలు చేపడుతున్నామని డిప్యూటీ సీఎం భట్టి విక్రమార్క తేల్చి చెప్పారు. అన్నీ లెక్కలతో సహా ప్రజల ముందు పెడతామన్నారు. ప్రజల ఆస్తులను కాపాడడం ప్రభుత్వ బాధ్యత అన్నారు.
