QuickLY
Socially
బాహుబలి' సినిమాల త‌ర్వాత దర్శకుడు రాజమౌళి రూపొందిస్తున్న 'ఆర్ఆర్ఆర్' సినిమా యూనిట్ ఉగాది సందర్భంగా మరో కొత్త పోస్టర్ ను విడుదల చేసింది. ఈ సినిమాలో కొమరం భీమ్‌గా ఎన్టీఆర్, అల్లూరి సీతారామరాజుగా రామ్ చరణ్ న‌టిస్తోన్న విష‌యం తెలిసిందే.
వారిద్ద‌రిని జ‌నాలు ఎత్తుకుని పైకి ఎగ‌రేస్తూ సంబ‌రాలు జ‌రుపుకుంటున్న‌ట్లు ఈ పోస్టర్ లో చూపించారు. జ‌నాలు త‌మ‌ను పైకి ఎగ‌రేస్తుండ‌గా ఇద్ద‌రు హీరోలు చిరునవ్వులు చిందిస్తున్నారు. ప్ర‌జ‌ల‌కు ఈ పోస్ట‌ర్‌తో ఆర్ఆర్ఆర్ టీమ్ ఉగాది శుభాకాంక్ష‌లు తెలిపింది. ఈ సినిమా యూనిట్ ఇప్పటికే విడుదల చేసిన పోస్ట‌ర్లు, టీజ‌ర్లు ప్రేక్ష‌కుల‌ను అల‌రించాయి.
'బాహుబలి' వంటి భారీ హిట్ త‌ర్వాత రాజమౌళి ఈ సినిమా తీస్తుండ‌డంతో దీనిపై ప్రేక్ష‌కుల్లో భారీ అంచనాలు ఉన్నాయి. ఈ సినిమాకు సంబంధించిన అప్‌డేట్స్ ను ఒక్కొక్క‌టిగా వదులుతూ రాజమౌళి ప్రేక్ష‌కుల్లో అంచ‌నాల‌ను మ‌రింత పెంచుతున్నారు. ఈ ఏడాది అక్టోబర్ 13వ తేదీన ఈ సినిమా విడుదల కానున్న‌ట్లు ఇప్పటికే ప్ర‌క‌ట‌న వ‌చ్చింది. ఈ సినిమా దాదాపు రూ.400 కోట్ల బడ్జెట్‌తో రూపుదిద్దుకుంటోంది.
Here's NTR Tweet
Here’s wishing you and your family a great year ahead 🤗@ssrajamouli @AlwaysRamCharan @ajaydevgn @aliaa08 @RRRMovie @DVVMovies @PenMovies @LycaProductions#ఉగాది #ಯುಗಾದಿ #GudiPadwa #नवसंवत्सर #தமிழ்ப்புத்தாண்டு #വിഷു #ਵੈਸਾਖੀ #RRRMovie pic.twitter.com/yKp1HO3qFr
— Jr NTR (@tarak9999) April 13, 2021
ఈ సినిమాకి ఎంఎం కీరవాణి సంగీతం అందిస్తున్నారు. గ్రాండియర్‌గా రాజమౌళి తెరకెక్కిస్తున్న ఈ సినిమాకి అంతే గ్రాండ్‌గా సంగీతం సమరకూరుస్తున్నారు ఆయన. తాజాగా బాలీవుడ్ సంగీత దర్శకుడు విశాల్ మిశ్రా షేర్ చేసిన ఓ ఫొటో అభిమానుల్లో నూతన ఉత్సాహాన్ని నింపింది. ‘మేము ఈ రోజు స్టూడియోలో మ్యాజిక్ చేశాము.. ఆర్ఆర్ఆర్ త్వరలో రాబోతుంది’ అంటూ రాజమౌళి, కీరవాణిలతో కలిసి దిగిన ఫొటోని విశాల్ షేర్ చేశారు. అంతే ఈ సినిమా సంగీతం పనులు శరవేగంగా సాగుతున్నాయంటూ ఆయన ఇన్‌డైరెక్ట్‌గా హింట్ ఇచ్చినట్లు తెలుస్తోంది.
డీవీవీ ఎంటర్‌టైన్‌మెంట్స్ బ్యానర్‌పై డీవీవీ దానయ్య పాన్ ఇండియా మూవీగా ఈ సినిమాని నిర్మిస్తున్నారు. ఈ సినిమాలో ఎన్టీఆర్‌కు జోడీగా హాలీవుడ్ నటి ఒలివియా మోరిస్ నటిస్తుండగా.. చరణ్‌కు జోడీగా బాలీవుడ్ బ్యూటీ ఆలియా నటిస్తోంది. అజయ్ దేవ్‌గన్ ఈ సినిమాలో ఓ కీలక పాత్రలో కనిపించనున్నారు. ఆలియా పుట్టిన రోజు సందర్భంగా ఆమె ఫస్ట్‌లుక్‌ని, అజయ్ దేవ్‌గన్ పుట్టినరోజు సందర్భంగా ఆయన ఫస్ట్‌లుక్‌ని కూడా విడుదల చేసింది చిత్ర యూనిట్. ఈ సినిమాని ఈ ఏడాది అక్టోబర్ 13వ తేదీన ప్రపంచవ్యాప్తంగా విడుదలకానుంది.
