PM Modi Facebook Video Row: ఫేస్బుక్లో మోదీ వీడియో ఎందుకు బ్లాక్ అయింది.. మెటా వివరణ ఇదే.. కేంద్రం రియాక్షన్ ఏంటంటే..
నీట్ (NEET) ప్రశ్నాపత్రం లీక్ అంశంపై భారత యువత, ముఖ్యంగా జెన్ జెడ్ను ఉద్దేశించి ప్రధానమంత్రి నరేంద్ర మోదీ చేసిన వీడియో సందేశం ఫేస్బుక్లో కొద్దిసేపు కనిపించకపోవడం దేశవ్యాప్తంగా చర్చనీయాంశంగా మారింది. అయితే ఈ ఘటనపై స్పందించిన మెటా సంస్థ అది సాంకేతిక లోపం (టెక్నికల్ గ్లిచ్) వల్ల జరిగిన పొరపాటేనని స్పష్టం చేస్తూ.. వీడియోను వెంటనే పునరుద్ధరించింది.
PM Modi Facebook Video Row: నీట్ (NEET) ప్రశ్నాపత్రం లీక్ అంశంపై భారత యువత, ముఖ్యంగా జెన్ జెడ్ను ఉద్దేశించి ప్రధానమంత్రి నరేంద్ర మోదీ చేసిన వీడియో సందేశం ఫేస్బుక్లో కొద్దిసేపు కనిపించకపోవడం దేశవ్యాప్తంగా చర్చనీయాంశంగా మారింది. అయితే ఈ ఘటనపై స్పందించిన మెటా సంస్థ అది సాంకేతిక లోపం (టెక్నికల్ గ్లిచ్) వల్ల జరిగిన పొరపాటేనని స్పష్టం చేస్తూ.. వీడియోను వెంటనే పునరుద్ధరించింది.
ఈ సందర్భంగా కేంద్ర ప్రభుత్వానికి మెటా సంస్థ అధికారికంగా క్షమాపణలు చెప్పింది. భారత ప్రధాని మోదీకి సంబంధించిన వీడియోను ఫేస్బుక్ వేదిక నుంచి హఠాత్తుగా తొలగించిన ఘటనపై మెటా ప్రతినిధులు స్పందిస్తూ ఈ మేరకు వివరణ ఇచ్చారు. కేవలం సాంకేతిక కారణాల వల్లే ఆ వీడియో తొలగించబడిందని.. తొందరపాటుతో జరిగిన ఈ పొరపాటును గుర్తించిన వెంటనే సదరు వీడియోను తిరిగి రిస్టోర్ చేశామని సంస్థ ప్రతినిధి ఒక ప్రకటనలో స్పష్టం చేశారు.
ప్రధానమంత్రి మోదీ జెన్ జెడ్ను నేరుగా ఉద్దేశించి చేసిన తొలి సెల్ఫీ-శైలి వీడియోగా ప్రచారం పొందిన ఈ సందేశం మంగళవారం కొంతసేపు ఫేస్బుక్లో అందుబాటులో లేకపోవడంతో వినియోగదారులు ఆశ్చర్యానికి గురయ్యారు. వీడియో లింక్ను ఓపెన్ చేయడానికి ప్రయత్నించిన వారికి అది కనిపించకపోవడంతో.. వీడియోను ఉద్దేశపూర్వకంగా తొలగించారా? లేక పరిమితం చేశారా? అనే సందేహాలు వ్యక్తమయ్యాయి.
ఈ వీడియోలో నీట్ ప్రశ్నాపత్రం లీక్ వ్యవహారంపై ప్రభుత్వం తీసుకుంటున్న చర్యలను ప్రధానమంత్రి వివరించడంతో పాటు.. పరీక్షల పారదర్శకతను కాపాడేందుకు చేపట్టిన చర్యలపై యువతకు సందేశం ఇచ్చారు.
ఘటనపై వివరణ ఇచ్చిన మెటా సంస్థ.. వీడియో తొలగింపు పూర్తిగా సాంకేతిక లోపం వల్ల జరిగిందని తెలిపింది. సమస్యను గుర్తించిన వెంటనే వీడియోను పునరుద్ధరించామని, ఇది ఎలాంటి ఉద్దేశపూర్వక చర్య కాదని స్పష్టం చేసింది. అయితే ఈ సాంకేతిక లోపం ఎలా సంభవించిందనే అంశంపై సంస్థ మరిన్ని వివరాలు వెల్లడించలేదు.
వీడియో తాత్కాలికంగా కనిపించకపోవడంపై పలువురు బీజేపీ నేతలు అభ్యంతరం వ్యక్తం చేశారు. ప్రధానమంత్రి అధికారిక పోస్ట్ ఎలా అదృశ్యమైందని ప్రశ్నిస్తూ.. సోషల్ మీడియా సంస్థలు మరింత పారదర్శకంగా వ్యవహరించాలని కోరారు. ఈ ఘటనపై ప్రభుత్వ వర్గాలు కూడా దృష్టి సారించినట్లు సమాచారం. మెటా నుంచి పూర్తి వివరణ కోరే అవకాశముందని రాజకీయ వర్గాల్లో చర్చ సాగుతోంది.
కొన్ని గంటల్లోనే వీడియో తిరిగి ఫేస్బుక్లో అందుబాటులోకి రావడంతో వినియోగదారులు మళ్లీ వీక్షించే అవకాశం లభించింది. మెటా ఇచ్చిన "టెక్నికల్ గ్లిచ్" వివరణతో తక్షణ వివాదం కొంతవరకు సద్దుమణిగినప్పటికీ.. అధికారిక ప్రభుత్వ కంటెంట్ కూడా సాంకేతిక లోపాల కారణంగా తాత్కాలికంగా తొలగించబడటం సోషల్ మీడియాలో విస్తృత చర్చకు దారితీసింది.
ఇటీవలి కాలంలో సోషల్ మీడియా ప్లాట్ఫారమ్లలో కంటెంట్ మోడరేషన్, పారదర్శకత, అల్గారిథమ్ల పనితీరుపై ప్రశ్నలు తలెత్తుతున్న నేపథ్యంలో ఈ ఘటన ప్రాధాన్యత సంతరించుకుంది. ముఖ్యంగా ప్రభుత్వ నేతల అధికారిక పోస్టుల నిర్వహణ, సాంకేతిక లోపాల నివారణ వంటి అంశాలపై మరింత స్పష్టత అవసరమనే అభిప్రాయాలు వ్యక్తమవుతున్నాయి.