UPI MDR: UPI MDR ఛార్జీ తప్పించుకోవచ్చా.. రూ.20,000 బిల్లును 10 పేమెంట్లుగా చెల్లిస్తే ఏం జరుగుతుందో తెలుసుకోండి..

UPI MDR: నేషనల్ పేమెంట్స్ కార్పొరేషన్ ఆఫ్ ఇండియా (NPCI) మార్గదర్శకాల ప్రకారం.. అక్టోబర్ 15, 2026 నుండి రూ. 2,000 దాటిన పర్సన్-టు-మర్చంట్ (P2M) UPI లావాదేవీలపై 0.4% మర్చంట్ డిస్కౌంట్ రేట్ (MDR) అమల్లోకి రానుంది. అలాగే రూ. 75,000 అంతకంటే ఎక్కువ విలువ గల లావాదేవీలకు గరిష్టంగా రూ. 300 ఫ్లాట్ MDR ఛార్జీని పరిమితిగా నిర్ణయించారు. అదే సమయంలో రూ. 2,000 లోపు ఉండే వ్యక్తి-నుండి-వ్యాపారి (P2M) చెల్లింపులకు, సాధారణ వ్యక్తి-నుండి-వ్యక్తి (P2P) లావాదేవీలకు MDR నుండి మినహాయింపు ఇచ్చారు. అయితే ఈ కొత్త నిబంధనల నేపథ్యంతో.. ఉదాహరణకు ఒక వినియోగదారుడు రూ. 20,000 బిల్లును ఒక్కొక్కటి రూ. 2,000 చొప్పున 10 విడివిడి చెల్లింపులుగా విభజించి చేస్తే MDR రుసుములను దాటవేయవచ్చా అనే సందేహం విస్తృతంగా వ్యక్తమవుతోంది.

ఈ అంశంపై ఆర్థిక, చెల్లింపుల రంగానికి చెందిన నిపుణులు స్పష్టమైన వివరణ ఇచ్చారు. సాధారణ బ్యాంక్ ఖాతాల నుంచి చేసే UPI లావాదేవీలలో MDR అనేది వ్యాపారి (మర్చంట్) భరించే వ్యయమే తప్ప, వినియోగదారుడి జేబుపై పడే భారం కాదని స్పష్టం చేస్తున్నారు. బ్యాంక్‌బజార్ సీఈఓ అధిల్ శెట్టి ప్రకారం.. ఒకే చెల్లింపును 10 సార్లు విభజించి చేయడం వల్ల వినియోగదారునికి ఎలాంటి ఆర్థిక లబ్ధి చేకూరదు. పైగా, భవిష్యత్తులో సదరు కొనుగోలుకు సంబంధించి రీఫండ్ కావాలన్నా లేదా లావాదేవీల రికార్డులను ట్రాక్ చేయాలన్నా తీవ్ర గందరగోళం ఏర్పడుతుందని, అందువల్ల సాధారణ నిబంధనల ప్రకారం ఒకేసారి పూర్తి మొత్తాన్ని చెల్లించడమే అత్యంత సురక్షితమైన, సరళమైన మార్గమని ఆయన సూచించారు.  ద్రవ్యోల్బణం పెరుగుదల వేళ RBI కీలక నిర్ణయం.. రెపో రేటు 5.5 శాతానికి పెంపు

మరోవైపు, వ్యాపారులు MDR తప్పించుకునేందుకు ఉద్దేశపూర్వకంగా బిల్లులను పలు చిన్న లావాదేవీలుగా విభజించేలా ప్రోత్సహిస్తే, అది చెల్లింపుల వ్యవస్థలో ఆడిటింగ్, కార్యాచరణ సంక్లిష్టతలకు దారితీస్తుందని గ్రాంట్ థోర్న్‌టన్ భారత్ భాగస్వామి రామ్‌కుమార్ సుబ్రమణియన్ విశ్లేషించారు. అంతర్లీనంగా ఉండే అసలు వాణిజ్య లావాదేవీ మూలాన్ని బట్టే చెల్లింపుల వ్యవస్థలు నియంత్రణలను వర్తింపజేస్తాయని, కేవలం సాంకేతిక లొసుగులతో కృత్రిమంగా విభజించడాన్ని అక్వైరర్లు, బ్యాంకులు , నియంత్రణ సంస్థలు నిశితంగా పర్యవేక్షిస్తాయని తెలిపారు. ఇటువంటి పద్ధతులు విస్తృతమైతే, సిస్టమ్ సమగ్రతను కాపాడేందుకు బ్యాంకులు అదనపు భద్రతా నిబంధనలను ప్రవేశపెట్టే అవకాశం ఉందని, ఫలితంగా వ్యాపారులకు ఆడిటింగ్ పరిశీలన , నియంత్రణపరమైన ఇబ్బందులు మరింత పెరుగుతాయని నిపుణులు హెచ్చరిస్తున్నారు.