Kinetic E-Luna: ఒకప్పటి కైనెటిక్ లూనా మోపెడ్ ఇప్పుడు ఎలక్ట్రిక్ అవతారంలో వచ్చేసింది, ఈ-లూనాను ఒక్కసారి ఛార్జ్ చేస్తే 110 కిలోమీటర్లు ప్రయాణం చేయొచ్చు, దీని ధర ఎంత.. ఫీచర్లు ఏమిటి? ఇక్కడ తెలుసుకోండి!
Kinetic E-Luna: ఒకప్పటిక్ ఐకానిక్ లూనా మోపెడ్ ఇప్పుడు ఎలక్ట్రిక్ అవతార్‌లో వచ్చేసింది. ఎలక్ట్రిక్ వాహన తయారీ సంస్థ కైనెటిక్ గ్రీన్ భారత మార్కెట్లో E-Luna ను ప్రవేశపెట్టింది. దీని ధరను ఎక్స్-షోరూమ్ వద్ద రూ. 70,000/- గా నిర్ణయించారు. అయితే ఈ ఎలక్ట్రిక్ లూనాను X1 మరియు X2 అనే రెండు వేరియంట్లలో విడుదల చేశారు. ఇందులో X1 బేస్ వేరియంట్‌కు ధర రూ. 69,990 కాగా, X2 వేరియంట్ కోసం ధర రూ. 74,990/- (ఎక్స్-షోరూమ్) నుంచి ప్రారంభమవుతుంది.
E-Luna సుస్థిర రవాణా దిశగా మార్పులో కీలక ఘట్టాన్ని సూచిస్తుంది. ఈ సరికొత్త కైనెటిక్ E-Luna భారత మార్కెట్లో TVS XL100 మోపెడ్ తో పోటీపడుతుంది.
ఈ E-Luna కోసం గణతంత్ర దినోత్సవం నాడు బుకింగ్‌లు ప్రారంభించంగా, ఇప్పటివరకు సుమారు 40 వేలమందికి పైగా వినియోగదారులు దీని కోసం ఆసక్తి చూపించినట్లుగా కైనెటిక్ గ్రీన్ వ్యవస్థాపకుడు, CEO అయిన సులజ్జ ఫిరోడియా మోత్వాని పేర్కొన్నారు.
E-Luna ఫీచర్లు, స్పెసిఫికేషన్లు
E-Luna ఒకప్పటి వింటేజ్ లుక్ ను కలిగి ఉండటంతో పాటు కొన్ని అత్యాధునిక ఫీచర్లను మిళితం చేసుకొని వచ్చింది. డిజైన్ పరంగా ఏకరీతిగా బాడీ పెయింట్, వృత్తాకార హెడ్‌ల్యాంప్, డ్యూయల్-ట్యూబ్యులర్ స్టీల్ చట్రంను కలిగి ఉంది. 150 కిలోల పేలోడ్ సామర్థ్యంతో అందిస్తున్నారు.
ఈ ఎలక్ట్రిక్ మోపెడ్‌లో 2.0 kWh లిథియం-అయాన్ బ్యాటరీ ప్యాక్ ఇచ్చారు. 22 Nm గరిష్ట టార్కును ఉత్పత్తి చేస్తుంది. గంటకు 50 కిమీ గరిష్ఠ వేగంతో ప్రయాణించగలదు. అంతేకాకుండా దీని బ్యాటరీ ప్రతి పూర్తి ఛార్జ్‌కు 110 కిమీల ప్రయాణ పరిధిని అందిస్తుంది. సుమారు 4 గంటలలో బ్యాటరీని పూర్తిగా ఛార్జ్ చేయవచ్చు.
మరిన్ని ఫీచర్ల గురించి చెప్పాలంటే, ఈ-లూనా పూర్తిగా డిజిటల్ LCD ఇన్‌స్ట్రుమెంట్ కన్సోల్, సైడ్-స్టాండ్ సెన్సార్, USB ఛార్జింగ్ పోర్ట్ తో పాటు అవసరమైన వస్తువులను తీసుకెళ్లడానికి అనుకూలమైన బ్యాగ్ హుక్స్‌ను కలిగి ఉంది. సామాగ్రిని తీసుకెళ్లటానికి అనుగుణంగా దీని వెనుక సీటును సులభంగా వేరుచేయవచ్చు. కస్టమర్లు వివిధ రకాల ఉపకరణాలతో E-లూనాను కస్టమైజ్ కూడా చేసుకోవచ్చు.
సరికొత్త E-Luna మల్బరీ రెడ్, ఓషన్ బ్లూ, పెర్ల్ ఎల్లో, స్పార్క్లింగ్ గ్రీన్, నైట్ స్టార్ బ్లాక్ అనే ఐదు ఆకర్షణీయమైన కలర్ ఆప్షన్లలో పొందవచ్చు.
దేశంలోని అన్ని కైనెటిక్ గ్రీన్ డీలర్‌షిప్‌ల నుండి E-Luna ను కొనుగోలు చేయవచ్చు. ఇప్పటికే బుకింగ్ చేసుకున్న వారికి డెలివరీలు త్వరలోనే ప్రారంభం కానున్నాయి. అంతేకాకుండా సరికొత్త E-Luna కోసం అమెజాన్ , ఫ్లిప్‌కార్ట్ వంటి ఇ-కామర్స్ వెబ్‌సైట్ల నుంచి కూడా బుక్ చేసుకోవచ్చు.
(Social media brings you the latest breaking news, viral news from the world of social media including Twitter, Instagram and YouTube. The above post is embedded directly from the user's social media account. This body of content has not been edited or may not be edited by Latestly staff. Opinions appearing on social media posts and the facts do not reflect the opinions of Latestly, and Latestly assumes no responsibility for the same.)