Pallaburusu Trailer Released: పళ్లబురుసు ట్రైలర్ ఇదిగో.. తండ్రి కొడుకుల మధ్య 'పళ్లబురుసు' పంచాయితీ: ఆకట్టుకుంటున్న అన్నపూర్ణ స్టూడియోస్ కొత్త చిత్రం ట్రైలర్!

Pallaburusu Trailer Released:  లెనిన్  సినిమా విజయంతో మంచి ఊపుమీదున్న ప్రముఖ నిర్మాణ సంస్థ అన్నపూర్ణ స్టూడియోస్ సమర్పణలో రూపుదిద్దుకున్న మరో ఆసక్తికర చిత్రం ‘పళ్లబురుసు’. తెలంగాణ గ్రామీణ నేపథ్యంలో పక్కా విలేజ్ కామెడీ డ్రామాగా తెరకెక్కిన ఈ సినిమా ట్రైలర్‌ను మేకర్స్ తాజాగా విడుదల చేశారు. వినూత్నమైన కాన్సెప్ట్, తెలంగాణ యాస, నవ్వులు పూయించే డైలాగులతో ఉన్న ఈ ట్రైలర్ సినీ ప్రియులను విశేషంగా ఆకట్టుకుంటోంది.

చిత్ర కథాంశం అంతా ఓ వినూత్నమైన పంచాయితీ చుట్టూ తిరుగుతుంది. తనకు కనీసం ఒక పళ్లబురుసు (టూత్ బ్రష్) కూడా కొనివ్వడం లేదంటూ ఓ తండ్రి తన సొంత కొడుకుపైనే పోలీస్ స్టేషన్‌లో కేసు పెట్టడంతో ట్రైలర్ ఆసక్తికరంగా మొదలవుతుంది. ఓవైపు అప్పుల బాధల్లో ఉన్న కొడుకు, మరోవైపు తండ్రి చిన్న కోరిక తీర్చలేక ఎదురయ్యే గొడవలు చివరకు కోర్టు వరకు వెళ్లడం నవ్వులు పూయిస్తోంది.

Pallaburusu Trailer Released

కేవలం కామెడీ మాత్రమే కాకుండా తండ్రీకొడుకుల మధ్య ఉండే ప్రేమాభిమానాలు, కుటుంబ భావోద్వేగాలను దర్శకుడు ఎంతో సహజంగా చూపించారు. కుటుంబ బాధ్యతల మధ్య నలిగిపోయే కొడుకు మనస్తత్వాన్ని, కొడుకు సాన్నిహిత్యాన్ని కోరుకునే తండ్రి ఆవేదనను హృదయానికి హత్తుకునేలా ఆవిష్కరించారు.

పక్కా తెలంగాణ గ్రామీణ వాతావరణం, పల్లెటూరి వృద్ధుల ముచ్చట్లు, యువ జంట ప్రేమకథ ఈ చిత్రానికి ప్రధాన బలంగా నిలవనున్నాయి. ‘బలగం’ సినిమాతో మెప్పించిన సుధాకర్ రెడ్డి, మురళీధర్ గౌడ్ ఇందులో తండ్రీకొడుకులుగా నటించారు. ప్రజ్వల్, గోమతి రెడ్డి, కిరణ్ మచా ఇతర ముఖ్య పాత్రల్లో కనిపించనున్నారు. ఈ చిత్రానికి ఉదయ్ చౌహాన్ దర్శకత్వం వహించగా, ‘లవ్ స్టోరీ’ చిత్రానికి బాణీలు అందించిన పవన్ సీహెచ్ సంగీతం సమకూర్చారు. అన్నపూర్ణ స్టూడియోస్, ఎపిక్ స్టూడియోస్ సంయుక్తంగా నిర్మిస్తున్న ఈ చిత్రానికి ఆదిత్య శెట్టి, వివేక్ కృష్ణాని నిర్మాతలుగా వ్యవహరిస్తున్నారు.

కంటెంట్ ఉన్న చిన్న సినిమాలను ఆదరించే తెలుగు ప్రేక్షకులకు ఈ విలేజ్ డ్రామా బాగా కనెక్ట్ అయ్యేలా ఉంది. సెంటిమెంట్, కామెడీ మిక్స్ అయిన ఈ ‘పళ్లబురుసు’ చిత్రం ఆగస్టు 14న ప్రపంచవ్యాప్తంగా థియేటర్లలో విడుదల కానుంది.