Telangana Politics: కొండా సురేఖకు బిగ్ షాక్.. మంత్రివర్గం నుంచి ఉద్వాసన.. సీఎం రేవంత్ రెడ్డిపై కీలక వ్యాఖ్యలు..

Telangana Politics: తెలంగాణ అధికార కాంగ్రెస్ వర్గాల్లో, రాష్ట్ర రాజకీయాల్లో తీవ్ర సంచలనం రేకెత్తిస్తూ ముఖ్యమంత్రి ఎ. రేవంత్ రెడ్డి కీలక నిర్ణయం తీసుకున్నారు. దేవాదాయ, అటవీ శాఖ మంత్రి కొండా సురేఖను మంత్రివర్గం నుంచి తక్షణమే బర్తరఫ్ చేస్తూ సీఎం సిఫార్సు చేయగా, సంబంధిత ప్రతిపాదనలను అధికారికంగా రాజ్ భవన్‌కు పంపారు. వరుస వివాదాలు, క్రమశిక్షణా ఉల్లంఘనల నేపథ్యంలో కాంగ్రెస్ అధిష్టానంతో ఢిల్లీలో సుదీర్ఘ చర్చలు జరిపిన అనంతరం రేవంత్ రెడ్డి ఈ కఠిన నిర్ణయాన్ని ప్రకటించారు.

మల్లారెడ్డి డ్యాన్స్ వీడియో ఇదిగో.. కాంగ్రెస్ 1000 రోజుల విఫల పాలన అంటూ ఊర మాస్ స్టెప్పులు..

మంత్రి పదవి నుంచి బర్తరఫ్ చేయడంతో పాటు పలు కీలక నామినేటెడ్ పదవుల్లోనూ ప్రభుత్వం భారీ మార్పులు చేపట్టింది. తెలంగాణ రాష్ట్ర ప్రణాళికా సంఘం ఉపాధ్యక్షుడిగా ఉన్న డాక్టర్ జి. చిన్నారెడ్డి నియామకాన్ని తక్షణమే రద్దు చేస్తూ, ఆయన స్థానంలో జిహెచ్‌ఎంసి మేయర్ గద్వాల్ విజయలక్ష్మిని ప్రణాళికా సంఘం నూతన ఉపాధ్యక్షురాలిగా నియమించారు. అలాగే, తెలంగాణ రాష్ట్ర మహిళా కమిషన్ చైర్‌పర్సన్‌గా నేరెళ్ల శారదను, కాకతీయ అర్బన్ డెవలప్‌మెంట్ అథారిటీ (కుడా) చైర్‌పర్సన్‌గా మాజీ రాజ్యసభ సభ్యురాలు జి. సుధారాణిని నియమిస్తూ ప్రభుత్వం ఉత్తర్వులు జారీ చేసింది.

మంత్రి కొండా సురేఖ కుమార్తె కొండా సుస్మితా పటేల్ ఇటీవల ముఖ్యమంత్రి రేవంత్ రెడ్డి, ఇతర పార్టీ నేతలపై చేసిన వ్యాఖ్యలు తీవ్ర వివాదాస్పదమయ్యాయి. ఈ అంశంపై టీపీసీసీ క్రమశిక్షణా కమిటీ సమర్పించిన నివేదికను పరిశీలించిన అధిష్టానం, పార్టీలో ఎవరికైనా క్రమశిక్షణే ముఖ్యమని భావించి ఈ చర్యలకు ఆమోదం తెలిపింది.

మరోవైపు తన బర్తరఫ్‌పై కొండా సురేఖ తీవ్రంగా మండిపడ్డారు. కనీసం వివరణ కూడా కోరకుండా, రాజ్యాంగబద్ధమైన ఆమోదముద్ర లేకుండా సర్క్యులర్ ద్వారా తనను తొలగించడం చెల్లదని ఆమె స్పష్టం చేశారు. సీఎం రేవంత్ రెడ్డి అధిష్టానాన్ని బెదిరించి, బ్లాక్‌మెయిల్ చేసి ఈ నిర్ణయం తీసుకున్నారని ఆరోపించారు. తన కుమార్తె రాజకీయ ఆకాంక్షలకు, వ్యాఖ్యలకు తనను బాధ్యురాలిని చేయడం సరికాదని ప్రశ్నిస్తూ, తన రాజకీయ భవిష్యత్తుపై భర్త కొండా మురళితో చర్చించి త్వరలోనే నిర్ణయం ప్రకటిస్తానని తెలిపారు.