Bank Strike: కేంద్ర ప్రభుత్వ ఉద్యోగులకు పండగే పండగ.. సెప్టెంబర్ 25నే అకౌంట్లోకి జీతాలు..బ్యాంక్ సమ్మె నేపథ్యంలో కేంద్రం నిర్ణయం..

Bank Strike: దేశవ్యాప్తంగా బ్యాంకింగ్ ఉద్యోగులకు ప్రాతినిధ్యం వహిస్తున్న యునైటెడ్ ఫోరమ్ ఆఫ్ బ్యాంక్ యూనియన్స్ (UFBU) ప్రతిపాదించిన మూడు రోజుల సమ్మె నేపథ్యంలో కేంద్ర ప్రభుత్వం కీలక నిర్ణయం తీసుకుంది. సెప్టెంబర్ 28 నుండి 30 వరకు నిర్వహించనున్న ఈ సమ్మె కాలంలో ఎలాంటి రవాణా లేదా ఆర్థిక ఆటంకాలు తలెత్తకుండా సెప్టెంబర్ నెలకు సంబంధించిన కేంద్ర ప్రభుత్వ ఉద్యోగుల జీతాలు, వేతనాలు, పెన్షన్లను సెప్టెంబర్ 25న (శుక్రవారం) ముందస్తుగానే పంపిణీ చేయాలని ఆర్థిక మంత్రిత్వ శాఖ ఉత్తర్వులు జారీ చేసింది.

కేంద్ర ఆర్థిక మంత్రిత్వ శాఖ పరిధిలోని కంట్రోలర్ జనరల్ ఆఫ్ అకౌంట్స్ (CGA) విడుదల చేసిన ఆఫీస్ మెమోరాండమ్ ప్రకారం, రక్షణ, తపాలా, టెలికమ్యూనికేషన్స్ విభాగాలతో పాటు కేంద్ర ప్రభుత్వ పారిశ్రామిక ఉద్యోగులు, పెన్షనర్లకు ఈ ముందస్తు చెల్లింపు నిబంధన వర్తిస్తుంది. ఈ విధంగా అందించే మొత్తాన్ని అడ్వాన్స్ చెల్లింపుగా పరిగణిస్తారని, పూర్తి నెల గణాంకాలను ధృవీకరించిన తర్వాత ఏవైనా మార్పులు లేదా సర్దుబాట్లు ఉంటే వాటిని అక్టోబర్ 2026 నెల జీతం నుంచి మినహాయిస్తారని స్పష్టం చేశారు.  బ్యాంక్ సమ్మెతో UPI పేమెంట్లు ఆగిపోతాయా.. మూడు రోజుల సమ్మెలో UPI, ATM, ఇంటర్నెట్ బ్యాంకింగ్‌పై తాజా అప్‌డేట్ ఇదిగో..

వారానికి 5 రోజుల బ్యాంకింగ్ పనిదినాలను (అన్ని శనివారాలకు సెలవు) అమల్లోకి తీసుకురావడం, పాత పెన్షనర్ల వేతన సవరణకు అనుగుణంగా పెన్షన్ల అప్‌డేట్, ఎన్‌పిఎస్ స్థానంలో పాత పెన్షన్ స్కీమ్ (OPS) పునరుద్ధరణ వంటి ప్రధాన డిమాండ్లతో UFBU ఈ సమ్మెకు పిలుపునిచ్చింది. ఈ సమ్మె బ్యాంకింగ్ రంగ అర్ధ-వార్షిక ముగింపు రోజైన సెప్టెంబర్ 30తో ఏకీభవిస్తుండటంతో కార్యకలాపాలపై తీవ్ర ప్రభావం పడే అవకాశముంది.

సమ్మె ప్రారంభమయ్యే ముందు రోజైన సెప్టెంబర్ 27 (ఆదివారం) ప్రజలకు తీవ్ర ఇబ్బందులు కలగకుండా ప్రభుత్వ రంగానికి చెందిన అన్ని బ్యాంకులు (PSBs) మరియు ప్రాంతీయ గ్రామీణ బ్యాంకులు (RRBs) సాధారణ పనిదినంలాగా తెరిచే ఉంటాయని రిజర్వ్ బ్యాంక్ ఆఫ్ ఇండియా (RBI) మరియు ఆర్థిక మంత్రిత్వ శాఖ స్పష్టం చేశాయి. సెప్టెంబర్ నెలాఖరులో జరగాల్సిన ఆర్థిక వ్యవహారాలు, ముఖ్యమైన చెల్లింపులను అంతరాయం కలగకుండా ముందుగానే పూర్తి చేసుకోవాలని ప్రభుత్వం సూచించింది.