Tirath Singh Rawat: ఉత్తరాఖండ్ కొత్త సీఎంగా తీరత్ సింగ్ రావత్, త్రివేంద్ర సింగ్ రావత్ రాజీనామా, 2013-15 మధ్య ఉత్తరాఖండ్‌లో పార్టీ అధ్యక్షుడిగా బాధ్యతలు నిర్వహించిన తీరత్ సింగ్ రావత్
కొత్త ముఖ్యమంత్రిగా బీజేపీ ఎంపీ తీరత్ సింగ్ రావత్ ఎంపికయ్యారు. త్రివేంద్ర సింగ్ రావత్ మంగళవారం రాజీనామా చేయడంతో బుధవారం నాటి బీజేపీ శాసనసభాపక్ష సమావేశంలో ఈ మేరకు నిర్ణయం తీసుకున్నారు. ఈ సాయంత్రం తీరత్ సింగ్ సీఎంగా ప్రమాణ స్వీకారం చేయనున్నారు.
Dehradun, March 10: ఉత్తరాఖండ్ ముఖ‍్యమంత్రి పీఠాన్ని ఎవరు అధిరోహించనున్నారనే అనేక అంచనాల మధ్య ఈ ఉత్కంఠకు తెరపడింది. కొత్త ముఖ్యమంత్రిగా బీజేపీ ఎంపీ తీరత్ సింగ్ రావత్ ఎంపికయ్యారు. త్రివేంద్ర సింగ్ రావత్ మంగళవారం రాజీనామా చేయడంతో బుధవారం నాటి బీజేపీ శాసనసభాపక్ష సమావేశంలో ఈ మేరకు నిర్ణయం తీసుకున్నారు. ఈ సాయంత్రం తీరత్ సింగ్ సీఎంగా ప్రమాణ స్వీకారం చేయనున్నారు.
ఈ సందర్భంగా తీరత్ సింగ్ రావత్ మాట్లాడుతూ తాను చిన్న గ్రామం నుండి వచ్చిన పార్టీ కార్యకర్తగా తాను ఈ స్థాయికి చేరుకుంటానని ఊహించలేదంటూ సంతోషం వ్యక్తం చేశారు. తనపై నమ్మకాన్ని ఉంచిన ప్రధాని, హోం మంత్రి పార్టీ చీఫ్‌కు కృతజ్ఞతలు తెలిపారు. ప్రజల ఆశలను నెరవేర్చడానికి అన్ని ప్రయత్నాలు చేస్తామనీ, గత నాలుగేళ్లుగా చేపట్టిన కృషిని ముందుకు తీసుకెళతామంటూ హామీ ఇచ్చారు. అయితే సీఎం రేసులో బీజేపీ ఎమ్మెల్యే ధన్ సింగ్ రావత్, బీజేపీ సీనియర్‌ నేత ఎంపీ అజయ్‌భట్‌, అనిల్‌ బలూని పేర్లు కూడా బాగా వినిపించిన సంగతి తెలిసిందే. మరోవైపు, కుమాన్‌ ప్రాంతం నుంచి ఒకరిని డిప్యూటీ సీఎంగా నియమించే అవకాశాలున్నాయని తెలుస్తోంది.
56 ఏళ్ల తీరత్ సింగ్ రావత్.. 2013-15 మధ్య ఉత్తరాఖండ్‌లో పార్టీ అధ్యక్షుడిగా బాధ్యతలు నిర్వహించారు. గతంలో రాష్ట్ర ఎమ్మెల్యేగా కూడా పనిచేశారు. కేంద్ర మంత్రి రమేష్ ఫోఖ్రియాల్ నిషాంక్, ఉత్తరాఖండ్ రాష్ట్ర మంత్రి ధన్ సింగ్ రావత్ తదితరుల పేర్లను పరిశీలించిన అనంతరం సీఎం పదవిని తీరత్ కు ఇవ్వాలని పార్టీ నిర్ణయించింది. మంగళవారం డెహ్రాడూన్‌లో పార్టీ లెజిస్లేచర్ మీటింగ్‌లో పాల్గొన్న బీజేపీ నేతలు ఈ నిర్ణయం తీసుకున్నారు. పనితీరు సరిగా లేని కారణంగా రాష్ట్రంలో నాయకత్వాన్ని మార్చాలనే డిమాండ్లు రావడంతో మాజీ సీఎం త్రివేండ్ర సింగ్ రావత్ తన సీఎం పదవికి రాజీనామా చేసిన విషయం తెలిసిందే.