Guru Purnima 2026: గురు పూర్ణమి 2026 తేదీ, శుభ ముహూర్తం, పూజా సమయం ఇవిగో.. గురు పౌర్ణమి రోజున ఎందుకు గురువులను ఆరాధిస్తారు?

Guru Purnima 2026: భారతీయ సనాతన సంప్రదాయంలో.. హిందూ క్యాలెండర్ ప్రకారం ఆషాఢ మాసంలో వచ్చే పూర్ణమికి ఎంతో ప్రత్యేకమైన మతపరమైన, ఆధ్యాత్మిక ప్రాముఖ్యత ఉంది. ఈ పవిత్ర దినాన్ని ఆషాఢ పౌర్ణమి లేదా గురు పూర్ణమిగా ఎంతో భక్తిశ్రద్ధలతో జరుపుకుంటారు. అజ్ఞానమనే చీకటి నుంచి జ్ఞానమనే వెలుగు వైపు మనల్ని నడిపించే మహోన్నత శక్తి గురువు. అటువంటి గురువులకు మన హృదయపూర్వక కృతజ్ఞతలు తెలియజేయడానికి.. వారి ఆశీస్సులు పొందడానికి ఈ పండుగ అంకితం చేయబడింది.

ప్రతి ఏటా వచ్చే గురు పౌర్ణమికి తనదైన ప్రత్యేకత ఉన్నప్పటికీ, ఈ సంవత్సరం జరగబోయే వేడుకలు మరింత విశేషంగా, అరుదైనవిగా నిలవబోతున్నాయి. జ్యోతిష్య దృక్కోణం ప్రకారం, ఈసారి గురు పౌర్ణమి నాడు అద్భుతమైన గ్రహస్థితులు రూపుదిద్దుకుంటున్నాయి. గత 56 సంవత్సరాల కాలంలో ఇటువంటి శక్తివంతమైన, అరుదైన రాజయోగం సంభవించడం ఇదే మొదటిసారి కావడం ఈ పండుగ విశిష్టతను రెట్టింపు చేస్తోంది.

 గురు పూర్ణిమ 2026 ఎప్పుడు? తేదీ, పూజా విధానం, ప్రాముఖ్యత గురించి తెలుసుకోండి

వైదిక పంచాంగం, క్యాలెండర్ వివరాలను పరిశీలిస్తే.. ఆషాఢ మాసపు పౌర్ణమి తిథి జూలై 28, 2026న సాయంత్రం 6:18 గంటలకు ప్రారంభమవుతుంది. ఈ తిథి మరుసటి రోజైన జూలై 29న రాత్రి 8:05 గంటల వరకు కొనసాగుతుంది. సనాతన ధర్మ విశ్వాసాల ప్రకారం సూర్యోదయ సమయానికి ఉన్న తిథినే (ఉదయ లగ్నం) ప్రధానంగా పరిగణిస్తారు కాబట్టి, ఉదయ తిథి జూలై 29న వస్తున్నందున పవిత్రమైన గురు పౌర్ణమి పండుగను జూలై 29వ తేదీనే దేశవ్యాప్తంగా ఘనంగా జరుపుకుంటారు. ఈ పవిత్ర దినాన గురు పూజతో పాటు శ్రీ సత్యనారాయణ స్వామి వ్రతాన్ని ఆచరించడం ఎంతో శుభప్రదమని పండితులు చెబుతున్నారు.

పూజలు, వ్రతాలు నిర్వర్తించుకోవడానికి జూలై 29వ తేదీ ఉదయం 5:41 గంటల నుండి ఉదయం 9:47 గంటల వరకు అత్యంత అనువైన, పవిత్రమైన సమయంగా నిర్ణయించారు. ఈ శుభ ముహూర్తంలో భక్తులు ఉదయాన్నే లేచి పవిత్ర స్నానాలు ఆచరించి, ఇళ్లలో సత్యనారాయణ స్వామి వ్రతాన్ని అత్యంత భక్తితో ప్రారంభించవచ్చు. కథా పఠనం చేయడం, స్వామివారికి నైవేద్యాలు సమర్పించడం, తమ జీవితంలో మార్గదర్శకులుగా నిలిచిన గురువులను ప్రత్యక్షంగా కానీ, మనస్సులో కానీ స్మరించుకుని వారి పాదాలకు ప్రణామం చేయడం వల్ల అనంతమైన పుణ్యఫలాలు లభిస్తాయి.

జ్యోతిష్య నిపుణుల ప్రకారం.. ఈ 56 ఏళ్ల తర్వాత వస్తున్న అరుదైన గ్రహస్థితి, రాజయోగం వల్ల ఈ గురు పౌర్ణమి నాడు చేసే జపం, తపం, పూజలు మరియు దానధర్మాలు వేల రెట్ల అధిక ఫలాన్ని ఇస్తాయి. సాధకులకు ఆధ్యాత్మిక మార్గంలో పురోగతి సాధించడానికి, మానసిక ప్రశాంతతను పొందడానికి మరియు ఇంట్లో సుఖసంతోషాలు వెల్లివిరిసేలా చేయడానికి ఈ సమయం ఎంతో శ్రేష్ఠమైనది. అజ్ఞానాన్ని తొలగించి జ్ఞానజ్యోతులను వెలిగించే గురు పరంపరను స్మరించుకుంటూ, ఈ అరుదైన ముహూర్తంలో పూజాధికాలు నిర్వహించి లక్ష్మీనారాయణుల, గురుదేవుల కృపాకటాక్షాలు పొందడానికి భక్తులు సమాయత్తమవుతున్నారు.