Khairatabad Ganesh Darshan: ఖైరతాబాద్ గణేశుడి దర్శనంపై కీలక ప్రకటన.. 23 అర్ధరాత్రి తర్వాత దర్శనం బంద్.. నిమజ్జనం ఎప్పుడంటే..

Khairatabad Ganesh Darshan: హైదరాబాద్‌లోని ప్రసిద్ధి చెందిన ఖైరతాబాద్ శ్రీ పంచముఖ సంకటహర మహాగణపతి దర్శనాలకు సంబంధించి ఉత్సవ కమిటీ అత్యంత కీలక ప్రకటన విడుదల చేసింది. వినాయక నిమజ్జన కార్యక్రమాల నేపథ్యంలో భక్తుల సౌకర్యార్థం, ముందస్తు ఏర్పాట్ల నిమిత్తం దర్శనాల సమయాల్లో మార్పులు చేసినట్లు వెల్లడించారు.

ముఖ్యమైన తేదీలు & సమయాలు:

దర్శనాల ముగింపు: సెప్టెంబర్ 23వ తేదీ అర్ధరాత్రి 12 గంటల వరకు మాత్రమే భక్తులకు మహాగణపతి దర్శనానికి అనుమతి ఉంటుంది.

ఏర్పాట్ల కోసం దర్శనాలు బంద్: సెప్టెంబర్ 24వ తేదీ నుండి నిమజ్జనానికి సంబంధించిన సాంకేతిక, భద్రతా , వెల్డింగ్ పనులు ప్రారంభం కానున్నందున భక్తుల దర్శనాలను పూర్తిగా నిలిపివేస్తారు.

శోభాయాత్ర & నిమజ్జన మహోత్సవం: సెప్టెంబర్ 25వ తేదీ ఉదయం ఖైరతాబాద్ మహాగణపతి శోభాయాత్ర , నిమజ్జన కార్యక్రమం ప్రారంభమవుతుంది.

శోభాయాత్ర మార్గం – పోలీసుల తనిఖీలు:

ఖైరతాబాద్ మహాగణపతి శోభాయాత్ర ఎలాంటి విఘ్నాలు లేకుండా, సజావుగా సాగేందుకు పోలీసులు, జీహెచ్‌ఎంసీ , వివిధ ప్రభుత్వ శాఖల అధికారులు ముందస్తు తనిఖీలు నిర్వహించారు. పంజాగుట్ట, సైఫాబాద్ ఏసీపీలు, ఖైరతాబాద్, సైఫాబాద్ ఇన్‌స్పెక్టర్లు, ఎస్‌ఐలతో పాటు ఉత్సవ కమిటీ సభ్యులు సోమవారం శోభాయాత్ర సాగే ప్రధాన మార్గాన్ని క్షేత్రస్థాయిలో పరిశీలించారు.

ప్రధాన తనిఖీ ప్రాంతాలు:

రాజ్‌దూత్ చౌరస్తా

ఎక్బాల్ మినార్

తెలుగు తల్లి చౌరస్తా

డాక్టర్ బి.ఆర్. అంబేద్కర్ సచివాలయం మార్గం

ఎన్టీఆర్ మార్గ్ (హుస్సేన్‌సాగర్ నిమజ్జన ప్రదేశం)

నిమజ్జనం రోజున భారీగా భక్తులు , వాహనాలు తరలివచ్చే అవకాశం ఉండటంతో, ట్రాఫిక్ మళ్లింపులు, విద్యుత్ వైర్ల తొలగింపు, భద్రతా చర్యలు , భక్తుల రాకపోకలకు సంబంధించిన ఏర్పాట్లను అధికారులు క్షుణ్ణంగా పర్యవేక్షించారు. భక్తులు ఈ సమయాలను గమనించి స్వామివారి దర్శనానికి ప్లాన్ చేసుకోవాలని ఉత్సవ కమిటీ కోరింది.