Holi Lunar Eclipse 2024: హోలీ పౌర్ణమి నాడే ఈ ఏడాది మొదటి చంద్రగ్రహణం, ఏ సమయంలో గ్రహణం ప్రారంభమవుతుంది, భారతదేశంలో దీని ప్రభావం ఎంత, పూర్తి వివరాలు ఇవిగో!

Holi Lunar Eclipse 2024: ఈ ఏడాది మార్చి 25న చంద్రగ్రహణం ఏర్పడనుంది. 2024లో మొదటి చంద్రగ్రహణం ఇదే కావడం ఒకటైతే ఈరోజే హోలీ పౌర్ణమి కావడం మరొక విశేషం. సాధారణంగా చంద్రుడు, భూమి, సూర్యుడు ఒకే సరళరేఖలోకి వచ్చినపుడు చంద్రగ్రహణం సంభవిస్తుంది. భూమి, చంద్రుడు వాటి వాటి కక్ష్యలలో పరిభ్రమిస్తున్నపుడు సూర్యుడికి అడ్డుగా భూమి వచ్చినట్లయితే భూమి నీడ చంద్రుడిపై పడుతుంది. ఫలితంగా, నిండుగా కనిపించాల్సిన చంద్రుడు కనుమరుగవుతాడు లేదా పాక్షికంగా దర్శనమిస్తాడు. ఈ ఖగోళ దృగ్విషయాన్ని చంద్రగ్రహణం అంటారు. ఇది పౌర్ణమి సమయంలో మాత్రమే ఇది జరుగుతుంది. అయితే ఈసారి హోలీ పండుగ రోజు ఏర్పడుతున్న ఈ "హోలీ చంద్ర గ్రహణం" అనేది పెనంబ్రల్ చంద్రగ్రహణం.

పెనంబ్రల్ చంద్రగ్రహణం అంటే ఏమిటి?

గ్రహణాలు మూడు రకాలుగా ఉంటాయి. అవి సంపూర్ణ, పాక్షిక మరియు పెనంబ్రల్. భూమి యొక్క పెనంబ్రాలోకి చంద్రుడు రాకపోతే దానిని పెనంబ్రల్ చంద్రగ్రహణం అంటారు. ఇది చంద్రుడు పెనుంబ్రా అని పిలువబడే భూమి నీడ యొక్క తేలికపాటి భాగం గుండా వెళుతున్నప్పుడు సంభవిస్తుంది. ఇలాంటి పరిస్థితిలో భూమి నీడ చంద్రునిపై తేలికగా ఉంటుంది. కాబట్టి గ్రహణం ఉన్నప్పటికీ చంద్రుడు దర్శనమిస్తాడు. అయితే స్పష్టంగా కనిపించక్పోయినా, మసకబారినట్లు కనిపిస్తాడు. 2024లో మొత్తంగా 5 గ్రహణాలు ఉన్నాయి. ఇందులో 3 సూర్య గ్రహణాలు కాగా, 2 చంద్ర గ్రహణాలు ఉన్నాయి. మార్చిలో ఏర్పడుతున్న చంద్రగ్రహణం మొదటిది. రెండోది సెప్టెంబర్ 18న ఉంది. కాగా, ఇప్పటికే ఒక సూర్యగ్రహణం సంభవించింది. మళ్లీ వచ్చే నెల ఏప్రిల్ 8న సంపూర్ణ సూర్యగ్రహణం, ఆపై అక్టోబర్ 2న మరొకటి ఉంది.

హోలీ చంద్రగ్రహణం 2024 తేదీ- సమయం

పెనుంబ్రల్ చంద్రగ్రహణం మార్చి 25, 2024న సోమవారం హోలీ పౌర్ణమి రోజున సంభవిస్తుంది.

భారతీయ కాలమానం ప్రకారం, గ్రహణం ఉదయం 10:23 గంటలకు ప్రారంభమై, మధ్యాహ్నం 3:02 గంటలకు ముగుస్తుంది.

సాధారణంగా, సూతక్ కాలం గ్రహణానికి తొమ్మిది గంటల ముందు ప్రారంభమవుతుంది, ఈ సమయంలో శుభ కార్యాలు, మతపరమైన కార్యకలాపాలకు దూరంగా ఉండాలని సిఫార్సు చేయబడింది. అయితే, మార్చి 25న సంభవించే పెనుంబ్రల్ చంద్రగ్రహణం భారతదేశంలో కనిపించదు కాబట్టి, సూతక్ కాలం గమనించబడదు. తత్ఫలితంగా, ఆచారాలపై ఎటువంటి ఆంక్షలు ఉండవు, ఆలయ తలుపులు కూడా తెరిచే ఉంటాయి.

చంద్రగ్రహణం 2024 ప్రభావం ఏయే ప్రదేశాల్లో ఉండనుంది?

చంద్రగ్రహణం భారతదేశంలో కనిపించదు, గ్రహణ ప్రభావం లేదు కాబట్టి హోలీ ఉత్సవాలపై ప్రభావం చూపదు. అయితే, ఇది అమెరికాలో, యూరప్‌లోని చాలా భాగాల నుండి పూర్తిగా కనిపిస్తుంది, ఆస్ట్రేలియా, తూర్పు ఆసియా మీదుగా గ్రహణం ప్రారంభమై.. ఆఫ్రికా మరియు ఐరోపాలోని పశ్చిమ భాగాలలో సంభవిస్తుంది. అలాగే పసిఫిక్, అట్లాంటిక్, ఆర్కిటిక్, అంటార్కిటికా అంతటా కనిపిస్తుంది. ఐర్లాండ్, బెల్జియం, స్పెయిన్, ఇంగ్లండ్, దక్షిణ నార్వే, ఇటలీ, పోర్చుగల్, రష్యా, జర్మనీ, జపాన్, స్విట్జర్లాండ్, నెదర్లాండ్స్ మరియు ఫ్రాన్స్‌లోని కొన్ని ప్రాంతాలలో గ్రహణ ప్రభావం ఉంటుంది.