Hyderabad Metro-RTC Pass: హైదరాబాద్‌లో ప్రయాణించే వారికి కామన్ ట్రావెల్ పాస్.. ఒకే కార్డుతో బస్సు, మెట్రో ప్రయాణం, ధరలు ఎలా ఉన్నాయంటే..

Hyderabad Metro-RTC Pass: హైదరాబాద్ నగరవాసులకు ప్రజా రవాణా వ్యవస్థలో ప్రయాణాన్ని మరింత సులభతరం చేస్తూ తెలంగాణ రాష్ట్ర రోడ్డు రవాణా సంస్థ (TGSRTC), హైదరాబాద్ మెట్రో రైల్ సంయుక్తంగా కామన్ ట్రావెల్ పాస్‌ను అందుబాటులోకి తీసుకొచ్చాయి. ప్రజాభవన్‌లో జరిగిన కార్యక్రమంలో డిప్యూటీ సీఎం మల్లు భట్టి విక్రమార్క ఈ నూతన సదుపాయాన్ని అధికారికంగా ప్రారంభించారు. ప్రతిరోజూ బస్సు నుండి మెట్రోకు, మెట్రో నుండి బస్సుకు మారే వేలాది మంది ప్రయాణికులకు ప్రత్యేకంగా రెండు వేర్వేరు టికెట్లు తీసుకోవాల్సిన అవసరం లేకుండా ఒకే పాస్‌తో ప్రయాణించే వెసులుబాటు దీని ద్వారా లభించింది.  నాలుగేళ్లు ఎక్కడ చదివితే అక్కడ స్థానికత.. ఏపీలో రెండేళ్లు చదివిన తెలంగాణ విద్యార్థినికి సుప్రీంకోర్టులో చుక్కెదురు..

ఈ కొత్త కామన్ పాస్‌లు హైదరాబాద్‌లోని అన్ని మెట్రో స్టేషన్లలో అందుబాటులో ఉంటాయి. ఔటర్ రింగ్ రోడ్డు (ORR) పరిధిలో నడిచే ఆర్టీసీ సిటీ బస్సులతో పాటు మెట్రో రైళ్లలో ఈ పాస్ చెల్లుబాటు అవుతుంది. అయితే ఈ సదుపాయం పుష్పక్ ఏసీ బస్సులకు వర్తించదని అధికారులు స్పష్టం చేశారు. రోజువారీ కామన్ పాస్ ధరను రూ.400 గా నిర్ణయించగా, ఇందులో మెట్రో వాటా రూ.300 మరియు ఆర్టీసీ వాటా రూ.100 గా ఉంటుంది. అలాగే నెలవారీ కామన్ పాస్ ధర రూ.8,500 గా ఉంది, ఇందులో మెట్రోకు రూ.7,000 మరియు ఆర్టీసీకి రూ.1,500 కేటాయించారు. కామన్ పాస్ కార్డు కొనుగోలు సమయంలో అదనంగా రూ.100 రీఫండబుల్ డిపాజిట్ చెల్లించాల్సి ఉంటుంది, కార్డును తిరిగి అప్పగించినప్పుడు ఆ మొత్తాన్ని వాపస్ ఇస్తారు.

కామన్ పాస్‌తో పాటు TGSRTC ‘మీ టికెట్’ పేరుతో ప్రత్యేక మొబైల్ యాప్‌ను కూడా ప్రారంభించింది. ఈ యాప్ ద్వారా ప్రయాణికులు నగర బస్సుల్లో కాగితపు టికెట్లు లేకుండానే ఫోన్‌లో ఎక్కే ప్రాంతం, గమ్యస్థానం ఎంచుకుని డిజిటల్ పేమెంట్ చేయడం ద్వారా డైనమిక్ QR కోడ్ టికెట్ పొందవచ్చు. ప్రయాణ సమయంలో కండక్టర్‌కు ఈ QR టికెట్ చూపిస్తే సరిపోతుంది. దీనివల్ల చిల్లర సమస్యలు మరియు క్యూలైన్ల వేచి ఉండే సమయం తగ్గుతుంది. అంతేకాకుండా ఈ యాప్‌లోనే రూ.600 ధరకు డిజిటల్ వీక్లీ బస్ పాస్ సదుపాయాన్ని కూడా అందుబాటులోకి తీసుకువచ్చారు. బస్ పాస్ కౌంటర్లకు వెళ్లే పనిలేకుండా యాప్‌లోనే ఏడు రోజుల అపరిమిత ప్రయాణ పాస్‌ను కొనుగోలు చేసి, అవసరమైనప్పుడు రెన్యూవల్ కూడా చేసుకోవచ్చు. నగర ప్రజా రవాణా వ్యవస్థను పూర్తిస్థాయిలో డిజిటలైజ్ చేసే దిశగా ఈ నిర్ణయాలు దోహదపడనున్నాయి.