Telangana Rains: తెలంగాణకు తప్పని వాయుగుండం ముప్పు.. రానున్న 48 గంటల్లో అత్యంత భారీ వర్షాలు.. 8 జిల్లాలకు హైఅలర్ట్, సీఎం రేవంత్ రెడ్డి కీలక ఆదేశాలు!

Telangana Rains: బంగాళాఖాతంలో ఏర్పడిన డీప్ డిప్రెషన్ (తీవ్ర వాయుగుండం) ప్రభావంతో తెలంగాణ రాష్ట్రవ్యాప్తంగా భారీ వర్షాలు కొనసాగుతున్నాయి. రానున్న 48 గంటల్లో రాష్ట్రంలో అత్యంత భారీ వర్షాలు కురిసే అవకాశం ఉందని భారత వాతావరణ శాఖ (IMD) తీవ్ర హెచ్చరికలు జారీ చేసింది. పశ్చిమ మధ్య, వాయవ్య బంగాళాఖాతంలో ఉన్న ఈ వాతావరణ వ్యవస్థ పశ్చిమ-వాయవ్య దిశగా పయనిస్తూ సెప్టెంబర్ 23 రాత్రికి ఉత్తర ఆంధ్రప్రదేశ్–దక్షిణ ఒడిశా తీరంలో విశాఖపట్నం, గోపాల్‌పూర్ మధ్య తీరం దాటనుంది.

దీని ప్రభావంతో తెలంగాణలో సెప్టెంబర్ 23, 24 తేదీల్లో ఉరుములు, మెరుపులు మరియు బలమైన ఈదురుగాలులతో కూడిన అత్యంత భారీ వర్షాలు పడనున్నాయి. సెప్టెంబర్ 25, 26 తేదీల్లోనూ రాష్ట్రవ్యాప్తంగా చాలా భారీ వర్షాలు కొనసాగే సూచనలు ఉన్నాయని వాతావరణ శాఖ తెలిపింది.

ఏపీలో భారీ నుంచి అతి భారీ వర్షాలు.. ఆరు జిల్లాల్లో స్కూళ్లకు సెలవులు..ఉత్తరాంధ్రకు ఫ్లాష్ ఫ్లడ్ అలర్ట్.. నేడు తీరం దాటనున్న వాయుగుండం..

వర్షాల తీవ్రత ప్రధానంగా ఉత్తర మరియు తూర్పు తెలంగాణ జిల్లాలపై ఎక్కువగా ఉండనుంది. **పెద్దపల్లి, జయశంకర్ భూపాలపల్లి, ములుగు, భద్రాద్రి కొత్తగూడెం, ఖమ్మం, మహబూబాబాద్, వరంగల్, హనుమకొండ** జిల్లాల్లోని పలు ప్రాంతాల్లో అత్యంత భారీ వర్షాలు నమోదయ్యే అవకాశం ఉండటంతో అధికారులను యంత్రాంగం అప్రమత్తం చేసింది. వీటితో పాటు కుమ్రంభీం ఆసిఫాబాద్, మంచిర్యాల, జగిత్యాల, కరీంనగర్ జిల్లాల్లోనూ భారీ వర్షాలు పడనున్నాయి.

హైదరాబాద్ నగరంలోనూ వర్ష ప్రభావం స్పష్టంగా కనిపిస్తోంది. కూకట్‌పల్లి, ఆల్వాల్, బాలానగర్, మల్కాజిగిరి, బోయిన్‌పల్లి, అంబర్‌పేట, కోఠి, లక్డీకాపూల్, షేక్‌పేట తదితర ప్రాంతాల్లో రోడ్లపై నీరు చేరి వాహన రాకపోకలకు అంతరాయం ఏర్పడింది. రానున్న రోజుల్లో నగరంలోనూ మోస్తరు నుంచి భారీ వర్షాలు కురిసే అవకాశం ఉంది.

భారీ వర్షాల హెచ్చరికల నేపధ్యంలో ముఖ్యమంత్రి రేవంత్ రెడ్డి అధికార యంత్రాంగాన్ని అప్రమత్తం చేశారు. హైదరాబాద్‌లో జీహెచ్‌ఎంసీ, పోలీస్, ట్రాఫిక్ మరియు విపత్తు నిర్వహణ విభాగాలు సమన్వయంతో పనిచేయాలని ఆదేశించారు. నీటిముంపు ప్రాంతాల్లో నివారించే ప్రజలకు తక్షణ సహాయం అందించేందుకు ప్రాధాన్యత ఇవ్వాలని, విద్యుత్ సరఫరాకు ఆటంకం కలగకుండా ముందస్తు చర్యలు తీసుకోవాలని స్పష్టం చేశారు. నీటిముంపు ప్రాంతాల్లో సహాయక చర్యల కోసం హైడ్రా (HYDRAA) డిజాస్టర్ రెస్పాన్స్ బృందాలు 24 గంటలు అందుబాటులో ఉంటాయని అధికారులు తెలిపారు. ప్రజలు అత్యవసరమైతే తప్ప ఇళ్ల నుంచి బయటకు రావద్దని, ఉప్పొంగే వాగులు, కాలువలను దాటే ప్రయత్నం చేయవద్దని హెచ్చరించారు.