UPI 123Pay: ఇంటర్నెట్ లేకపోయినా ఫోన్‌పే ద్వారా డబ్బులు పంపవచ్చు.. ఫీచర్ ఫోన్ వినియోగదారుల కోసం యూపీఐ 123పే ప్రారంభించనున్న PhonePe

UPI 123Pay: దేశీయ ఫిన్‌టెక్ దిగ్గజం ఫోన్‌పే (PhonePe), ఫీచర్ ఫోన్ వినియోగదారుల కోసం ఒక విప్లవాత్మక సేవను అందుబాటులోకి తెచ్చింది. ఇంటర్నెట్ కనెక్షన్ లేకుండానే డిజిటల్ చెల్లింపులు చేసుకునేలా ఫోన్‌పే యూపీఐ 123పే (PhonePe UPI 123Pay) సేవలను ప్రారంభించినట్లు ప్రకటించింది. ఈ సేవను అందించడం ద్వారా దేశవ్యాప్తంగా ఉన్న దాదాపు 20 కోట్లకు పైగా ఫీచర్ ఫోన్ వినియోగదారులకు యూపీఐని విస్తరించిన మొదటి ప్రధాన థర్డ్-పార్టీ అప్లికేషన్ ప్రొవైడర్ (TPAP)గా ఫోన్‌పే నిలిచింది. ఈ కొత్త ప్లాట్‌ఫారమ్ నెట్‌వర్క్ లేని లేదా పరిమితమైన 2G కనెక్టివిటీ ఉన్న ప్రాంతాలలో కూడా సురక్షితంగా పని చేసేందుకు ప్రత్యేక ఎస్‌ఎమ్‌ఎస్ (SMS) ఆధారిత సాంకేతికతను ఉపయోగిస్తుంది.

వినియోగదారులకు ఈ సేవలను మరింత సులభంగా అందించేందుకు నోకియా (Nokia), హెచ్‌ఎమ్‌డి (HMD), లావా ఇంటర్నేషనల్ (Lava), మరియు ఐటెల్ మొబైల్ (itel) వంటి ప్రముఖ ఫీచర్ ఫోన్ తయారీ సంస్థలతో ఫోన్‌పే భాగస్వామ్యం కుదుర్చుకుంది. ఇకపై వచ్చే కొత్త ఫీచర్ ఫోన్‌లలో ఈ యూపీఐ 123పే ఫీచర్ నేరుగా ప్రీ-లోడ్ అయి రానుంది. మొబైల్ ఫోన్ ద్వారా చెల్లింపులు చేసే వెసులుబాటును కేవలం స్మార్ట్‌ఫోన్ వినియోగదారులకే పరిమితం చేయకుండా, దేశంలోని ప్రతి పౌరుడికీ అందుబాటులోకి తేవడమే తమ ప్రధాన ఉద్దేశమని ఫోన్‌పే వ్యవస్థాపకుడు, సీఈఓ సమీర్ నిగమ్ తెలిపారు.

లభించే ప్రధాన సేవలు, ఫీచర్లు

సులభమైన లావాదేవీలు: వినియోగదారులు డబ్బులు పంపుకోవడంతో (P2P) పాటు వ్యాపారులకు చెల్లింపులు (P2M) చేయవచ్చు. కెమెరా ఉన్న ఫీచర్ ఫోన్లలో క్యూఆర్ కోడ్ స్కాన్ చేసి కూడా పేమెంట్ చేసే సదుపాయం ఉంది.

ఖాతా నిర్వహణ: బ్యాంక్ బ్యాలెన్స్ తనిఖీ చేసుకోవడం, పాత లావాదేవీల వివరాలు (History) చూడటం మరియు ప్రొఫైల్ మేనేజ్‌మెంట్ చేసుకోవచ్చు.

12 ప్రాంతీయ భాషల్లో వాయిస్-హెల్ప్‌లైన్: మొదటిసారి ఈ సేవను ఉపయోగించే వారికి మార్గనిర్దేశం చేసేందుకు ఏఐ (AI) ఆధారిత వాయిస్ అసిస్టెంట్‌ను అందుబాటులోకి తెచ్చారు. ఇది ఇంగ్లీష్‌తో పాటు 12 భారతీయ భాషల్లో సహాయం అందిస్తుంది.

రైలు టికెట్ బుక్ చేస్తున్నారా.. IRCTC వెబ్‌సైట్, యాప్‌లలో డార్క్ ప్యాటర్న్‌ల కలకలం.. లోకల్‌సర్కిల్స్ సర్వేలో షాకింగ్ నిజాలు!

త్వరలోనే ఈ ప్లాట్‌ఫారమ్ ద్వారా మొబైల్ రీఛార్జ్‌లు, కరెంట్ మరియు ఇతర యుటిలిటీ బిల్లుల చెల్లింపుల సేవలను కూడా ప్రవేశపెట్టనున్నట్లు ఫోన్‌పే తెలిపింది. 71.5 కోట్లకు పైగా నమోదు చేసుకున్న వినియోగదారులు, 5 కోట్లకు పైగా వ్యాపార భాగస్వాములతో భారతదేశంలో అగ్రగామిగా ఉన్న ఫోన్‌పే, ఈ నిర్ణయంతో గ్రామీణ ఆర్థిక వ్యవస్థలో డిజిటల్ విప్లవాన్ని మరింత వేగవంతం చేయనుంది.