Trump-Iran Conflict: ఇరాన్ మీద మళ్లీ బాంబు దాడులు.. ఆగ్రహంతో ఊగిపోతున్న ట్రంప్.. టెహ్రాన్ 7 రోజుల కాల్పుల విరమణ ప్రతిపాదనకు నో..

Trump-Iran Conflict: అమెరికా–ఇరాన్ మధ్య కొనసాగుతున్న తీవ్ర సాయుధ దాడులు , ఉద్రిక్తతల నేపథ్యంలో పశ్చిమాసియా రాజకీయాల్లో ఎంతో ప్రాధాన్యత కలిగిన ఒక కీలక పరిణామం చోటుచేసుకుంది. అంతర్జాతీయంగా అత్యంత వ్యూహాత్మక ప్రాంతమైన హోర్ముజ్ జలసంధిని తిరిగి తెరిచి సాధారణ నౌకాయానాన్ని పునరుద్ధరించడంతో పాటు, ప్రాంతీయంగా సైనిక ఘర్షణలను నిలిపివేసి శాంతి నెలకొల్పడానికి మార్గం సుగమం చేసేలా ఇరాన్ ఒక ఏడు రోజుల ప్రత్యేక ప్రతిపాదనను అమెరికా ప్రభుత్వం ముందుకు తీసుకువచ్చింది.

అయితే ఈ ప్రతిపాదనను అమెరికా అధ్యక్షుడు డోనాల్డ్ ట్రంప్ తోసిపుచ్చినట్లు ప్రముఖ అంతర్జాతీయ వార్తా సంస్థ వాల్ స్ట్రీట్ జర్నల్ వెల్లడించింది. అమెరికా ఉన్నతాధికారులను ఆధారంగా చేసుకుని ప్రచురించిన ఆ నివేదిక ప్రకారం, రాబోయే నవంబర్ నెలలో జరిగే అమెరికా మధ్యంతర ఎన్నికలు ముగిసిన వెంటనే ఇరాన్‌పై మళ్లీ వైమానిక దాడులను ఉధృతం చేసే అవకాశం ఉందని ట్రంప్ తన సన్నిహిత వర్గాల వద్ద వ్యాఖ్యానించినట్లు తెలుస్తోంది.  గ్రీన్ కార్డు కోసం ఎదురుచూస్తున్న భారతీయులకు బిగ్ అలర్ట్.. సెప్టెంబర్ 18 నుంచి కొత్త నిబంధనలు.. ఇండియన్లపై ఎలాంటి ప్రభావం పడుతుంది..

న్యూయార్క్‌లో జరిగిన ఐక్యరాజ్యసమితి సాధారణ సభ సమావేశాల సందర్భంగా ఇరాన్ విదేశాంగ మంత్రి అబ్బాస్ అరాఘ్చీ ఈ ఏడు రోజుల దౌత్య ప్రణాళికను బహిరంగపరిచారు. అమెరికా తమ షరతులకు సుముఖత వ్యక్తం చేసిన వెంటనే ఏడు రోజుల ప్రక్రియ ప్రారంభమవుతుందని, అందులో భాగం‌గానే ఇరు దేశాల మధ్య శాంతి నెలకొనడంతో పాటు కీలకమైన హోర్ముజ్ జలసంధి తెరుచుకుంటుందని ఆయన స్పష్టం చేశారు.

ఖతార్ మధ్యవర్తిత్వంలో ఈ ప్రతిపాదన పత్రాలను వాషింగ్టన్‌కు అందజేసినట్లు అంతర్జాతీయ కథనాలు పేర్కొంటున్నాయి. ఈ ప్రతిపాదనలో ఇరాన్ రేవులపై అమెరికా అమలు చేస్తున్న నౌకాదళ దిగ్బంధాన్ని ఎత్తివేయడం, చమురు ఎగుమతులపై విధించిన ఆంక్షలను సడలించడం , నిలిచిపోయిన నిధులను విడుదల చేయడం వంటి ప్రధాన డిమాండ్లు ఉన్నాయి. వీటితో పాటు తమ అణు కార్యక్రమంపై మళ్లీ చర్చలు జరిపేందుకు తాము సిద్ధంగా ఉన్నామని ఇరాన్ ప్రతిపాదించింది.

ప్రపంచవ్యాప్తంగా జరిగే మొత్తం చమురు రవాణాలో ఐదో వంతు భాగం ఒక్క హోర్ముజ్ జలసంధి ద్వారానే సాగుతుండటంతో ఈ మార్గం మూతపడటం అంతర్జాతీయ మార్కెట్లలో చమురు ధరలు పెరిగిపోవడానికి, రవాణా వ్యయాలు భారమై ద్రవ్యోల్బణం తీవ్రతరం కావడానికి దారితీస్తోంది. ఇరాన్ వైఖరి దౌత్య మార్గాన్ని ఎంచుకున్నట్లు కనిపిస్తున్నప్పటికీ, వాషింగ్టన్ వర్గాల నుంచి వస్తున్న సంకేతాలు మాత్రం తక్షణ ఒప్పందానికి ఆస్కారం లేదని స్పష్టం చేస్తున్నాయి. ఇరాన్ తన వ్యాపార ప్రయోజనాలు పొందే వరకు కాలయాపన చేస్తోందనే అనుమానాలు ట్రంప్‌కు ఉండటం వల్ల ఈ ప్రతిపాదనను అధికారికంగా ఆమోదించడానికి అమెరికా వెనుకాడింది.

నవంబర్ మధ్యంతర ఎన్నికల తరువాత ఇరాన్‌పై మిలిటరీ చర్యలను మరింత పెంచే యోచనలో అమెరికా ఉన్నట్లు వార్తలు వస్తున్నప్పటికీ, పరిస్థితులకు అనుగుణంగా అమెరికా తుది నిర్ణయం మారే అవకాశం ఉందనే అభిప్రాయాలు కూడా వ్యక్తమవుతున్నాయి. ఐక్యరాజ్యసమితి వేదికగా ఒకవైపు శాంతి చర్చలకు అవకాశాలు ఉన్నాయని చెబుతూనే, ఇరాన్‌పై ఆర్థిక, సైనిక ఒత్తిళ్లను కొనసాగించే వైఖరిని అమెరికా ప్రదర్శిస్తోంది. ఈ పరిణామాల మధ్య హార్ముజ్ జలసంధి ఎప్పుడు పూర్తిస్థాయిలో తెరుచుకుంటుంది , సైనిక ఉద్రిక్తతలకు ముగింపు లభిస్తుందా అనే అంశంపై ప్రపంచ దేశాలు తీవ్ర ఉత్కంఠతో ఎదురుచూస్తున్నాయి.