Oracle Layoffs: షేర్ మార్కెట్లో దూసుకుపోతున్న ఒరాకిల్.. మరో వైపు 10 వేల మందిని ఇంటికి సాగనంపేందుకు ప్రయత్నాలు ముమ్మరం..

Oracle Layoffs: ఆర్టిఫిషియల్ ఇంటెలిజెన్స్ మౌలిక సదుపాయాల రంగంలో దూసుకుపోతూ రికార్డు స్థాయి మార్కెట్ విలువను సొంతం చేసుకుంటున్న టెక్నాలజీ దిగ్గజం ‘ఒరాకిల్’ (Oracle) సంస్థలో మరోవైపు తీవ్ర అనిశ్చితి నెలకొంది. ఏఐ విభాగంలో భారీగా చేస్తున్న మూలధన వ్యయాలను సమతుల్యం చేసుకునేందుకు అంతర్జాతీయంగా వేలాది మంది ఉద్యోగులపై లేఆఫ్స్ వేటు వేసేందుకు సంస్థ సిద్ధమవుతున్నట్లు తెలుస్తోంది. ఫస్ట్‌పోస్ట్ నివేదిక ప్రకారం ప్రపంచవ్యాప్తంగా దాదాపు 7,000 నుండి 10,000 వరకు ఉద్యోగ కోతలు ఉండవచ్చనే ఊహాగానాలు తీవ్రమయ్యాయి. సెప్టెంబర్ మధ్యకాలం నాటికి దీనిపై స్పష్టత వచ్చే అవకాశం ఉండటంతో ఉద్యోగులు తీవ్ర భయాందోళనలకు గురవుతున్నారు.

ఆగని ఉద్యోగాల కోతలు.. 4 వేల మందిని ఇంటికి సాగనంపుతున్న జాగ్వార్ ల్యాండ్ రోవర్.. తీవ్ర నష్టాల్లో మునిగిపోయిన లగ్జరీ కార్ల దిగ్గజం..

గతంలో ఉదయం పూట సామూహిక ఇమెయిల్ నోటిఫికేషన్లు పంపి ఒకేసారి వేలమందిని తొలగించిన ఒరాకిల్, ఈసారి చాలా నిశ్శబ్దంగా కోతలు విధిస్తోందని ఉద్యోగ వర్గాలు పేర్కొంటున్నాయి. నిబంధనల ఫైలింగ్స్ ప్రకారం గత ఆర్థిక సంవత్సరంలోనే ఒరాకిల్ పూర్తికాల సిబ్బంది సంఖ్య 1,62,000 నుండి 1,41,000 కు దారుణంగా పడిపోయింది. భారతదేశంలో ఉన్న భారీ ఇంజనీరింగ్, గ్లోబల్ సపోర్ట్ బృందాలపై ఈ ప్రభావం పడే అవకాశం ఉండటంతో, సిబ్బంది అంతర్గత వర్క్‌స్పేస్ డైరెక్టరీలు, మెసేజింగ్ ప్లాట్‌ఫారమ్‌లలో యాక్టివ్ యూజర్ల సంఖ్యను నిశితంగా పర్యవేక్షిస్తున్నారు.

ఒకవైపు ఆటోమేటెడ్ కార్యకలాపాలు, అధునాతన ఏఐ సాధనాల వినియోగం పెరగడంతో సాధారణ సిబ్బంది అవసరం తగ్గుతోందని కంపెనీ వర్గాలు అంగీకరిస్తున్నాయి. విచిత్రమేమిటంటే, ఏఐ డెవలపర్‌లతో కుదిరిన భారీ క్లౌడ్ ఒప్పందాల కారణంగా ఒరాకిల్ స్టాక్ మార్కెట్లో అద్భుతమైన ర్యాలీని నమోదు చేస్తోంది. అయితే భారీగా పెంచిన క్లౌడ్, డేటా సెంటర్ల వ్యయాలు స్వల్పకాలిక ఆదాయ వృద్ధిగా మారకపోవడం, ఎంటర్‌ప్రైజ్ సాఫ్ట్‌వేర్ రంగంలో జరుగుతున్న పునర్వ్యవస్థీకరణే ఈ నిశ్శబ్ద ఉద్యోగ కోతలకు ప్రధాన కారణమని విశ్లేషకులు స్పష్టం చేస్తున్నారు.