FII Selling India: భారత్‌ను వీడుతున్న విదేశీ పెట్టుబడిదారులు.. స్టాక్ మార్కెట్ల నుంచి రూ.3 లక్షల కోట్లకు పైగా ఫారిన్ పెట్టుబడులు ఔట్.. అసలు కారణాలివే..

FII Selling India: భారతీయ ఈక్విటీ మార్కెట్లలో విదేశీ సంస్థాగత పెట్టుబడిదారుల (FII) వాటాలు వేగంగా ఆవిరైపోతున్నాయి. ప్రస్తుత 2026 సంవత్సరంలో ఇప్పటివరకు విదేశీ ఇన్వెస్టర్లు జరిపిన నికర నిష్క్రమణ ఏకంగా రూ. 3.04 లక్షల కోట్లను దాటేసింది. గడిచిన 2025 మొత్తం సంవత్సరంలో రికార్డు స్థాయిలో విక్రయించిన రూ. 1.66 లక్షల కోట్ల కంటే ఇది దాదాపు రెట్టింపు కావడం ఆర్థిక రంగాన్ని తీవ్ర ఆందోళనకు గురిచేస్తోంది. అమెరికాలో ఉద్యోగం చేస్తున్న భారతీయులకు షాక్.. అమెరికా గ్రీన్ కార్డ్ ప్రాసెస్ నిలిపివేత..

గత జూలై, ఆగస్టు నెలల్లో మార్కెట్లోకి కొద్దిపాటి నిధులు వచ్చి పునరుద్ధరణ సంకేతాలు కనిపిస్తున్నట్లు అనిపించినప్పటికీ.. ఆ తర్వాత ప్రారంభమైన విక్రయాల హోరు ఆ ఆశలను పూర్తిగా తుడిచిపెేసింది. డిపాజిటరీ, ఎక్స్ఛేంజ్ గణాంకాల ప్రకారం కేవలం అక్టోబర్ నెలలోనే (అక్టోబర్ 9 నాటికి) ఎఫ్‌ఐఐలు ఏకంగా రూ. 44,166 కోట్ల విలువైన షేర్లను అమ్మేశారు. ఇది అంతకుముందు సెప్టెంబర్ నెలలో జరిగిన రూ. 35,861 కోట్ల విక్రయాల రికార్డును ఇప్పటికే అధిగమించింది. దేశీయ సంస్థాగత పెట్టుబడిదారులు (DII) వేల కోట్ల రూపాయల కొనుగోళ్లతో మార్కెట్‌ను ఆదుకోవడానికి తీవ్రంగా ప్రయత్నిస్తున్నప్పటికీ, ఈ విదేశీ విక్రయాల దెబ్బకు నిఫ్టీ, సెన్సెక్స్ సూచీలు వరుస మద్దతు స్థాయిలను కోల్పోతున్నాయి.

పెట్టుబడుల ఉపసంహరణకు ప్రధాన కారణాలు:

అంతర్జాతీయ వర్ధమాన మార్కెట్ల ఒత్తిడి: ఇది కేవలం భారత్‌కే పరిమితమైన సమస్య కాదని, మొత్తం వర్ధమాన మార్కెట్ల (Emerging Markets) నుండి విదేశీ పెట్టుబడులు బయటకు తరలిపోతున్నాయని మార్కెట్ విశ్లేషకులు స్పష్టం చేస్తున్నారు.

ప్రియమైన వాల్యుయేషన్లు: భారత్‌లో షేర్ల వాల్యుయేషన్లు అత్యంత ప్రియంగా ఉండటం విదేశీ ఇన్వెస్టర్లను వెనక్కు తగ్గేలా చేస్తోంది. కృత్రిమ మేధస్సు రంగంలో రాబడులను అందిస్తున్న దక్షిణ కొరియా వంటి ఆసియా మార్కెట్లు విదేశీ నిధులను విశేషంగా ఆకర్షిస్తుండటంతో, భారతీయ ఈక్విటీలలో ప్రత్యేక ఆకర్షణ కొరవడిందనే అభిప్రాయం వ్యక్తమవుతోంది.

భౌగోళిక రాజకీయ ఉద్రిక్తతలు, చమురు ధరలు: పశ్చిమాసియా ప్రాంతంలో ముఖ్యంగా సౌదీ-హౌతీ ఘర్షణల వల్ల నెలకొన్న ఉద్రిక్తతల కారణంగా బ్రెంట్ చమురు ధర బ్యారెల్‌కు సుమారు 100 డాలర్ల వద్ద నిలకడగా కొనసాగుతోంది. చమురు దిగుమతులపై తీవ్రంగా ఆధారపడే భారత్‌కు ఇది కోలుకోలేని దెబ్బగా మారింది.

అమెరికా బాండ్ ఈల్డ్స్, రూపాయి పతనం: అమెరికాలో 10-సంవత్సరాల ట్రెజరీ బాండ్ ఈల్డ్స్ 5.3 శాతానికి చేరి 2002 తర్వాత అత్యధిక స్థాయిని తాకడం వల్ల, విదేశీ మదుపర్లు సురక్షితమైన యూఎస్ బాండ్ల వైపు తమ నిధులను మళ్లిస్తున్నారు. అలాగే డాలర్‌తో పోలిస్తే రూపాయి మారకం విలువ రూ. 96 స్థాయి దాటి పతనం కావడం వల్ల, విదేశీ పెట్టుబడిదారులకు వచ్చే డాలర్ రాబడులు గణనీయంగా తగ్గిపోతున్నాయి.

క్రూడ్ ఆయిల్ ధరలు: పెరిగిన చమురు ధరలు భారత్ దిగుమతుల బిల్లు, ద్రవ్యోల్బణంపై ఒత్తిడి పెంచవచ్చు.

ఈ విక్రయాల పరంపరను భారత ఆర్థిక వ్యవస్థపై విశ్వాసం కోల్పోవడంగా భావించకూడదని, ఇది గ్లోబల్ పోర్ట్‌ఫోలియోల సర్దుబాటు మరియు రిస్క్ నిర్వహణలో భాగమేనని ఆర్థిక నిపుణులు పేర్కొంటున్నారు. అయినప్పటికీ, నిఫ్టీలోని కీలకమైన 24,000, 23,000, 22,500 మద్దతు స్థాయిలు విచ్ఛిన్నం కావడంతో మార్కెట్లో అస్థిరత పెరిగింది. పశ్చిమాసియా ఘర్షణలు ఒక కొలిక్కి వచ్చి, ముడి చమురు ధరలు తగ్గి, కార్పొరేట్ కంపెనీల ఆదాయాల గణాంకాలు మెరుగయ్యే వరకు మార్కెట్లపై ఈ విదేశీ విక్రయాల ఒత్తిడి కొనసాగే అవకాశం ఉందని నిపుణులు విశ్లేషిస్తున్నారు.