Delhi Fire: ఢిల్లీలో భారీ అగ్ని ప్రమాదం, నాలుగు దుకాణాలు తీవ్రంగా దెబ్బతిన్నట్లు వార్తలు మంటలను అదుపులోకి తీసుకువస్తున్న ఫైర్ సిబ్బంది
దేశ రాజధాని నగరం ఢిల్లీలోని లజపత్ నగర్ మార్కెట్లోని ఓ షోరూమ్‌లో భారీ అగ్ని ప్రమాదం సంభవించింది. మంటలను ఆర్పేందుకు హుటాహుటిన దాదాపు 30 అగ్నిమాపక శకటాలు చేరుకున్నాయి.
దేశ రాజధాని నగరం ఢిల్లీలోని లజపత్ నగర్ మార్కెట్లోని ఓ షోరూమ్‌లో భారీ అగ్ని ప్రమాదం సంభవించింది. మంటలను ఆర్పేందుకు హుటాహుటిన దాదాపు 30 అగ్నిమాపక శకటాలు చేరుకున్నాయి. అగ్నిమాపక శాఖ అధికారులు తెలిపిన సమాచారం ప్రకారం, లజపత్ నగర్ సెంట్రల్ మార్కెట్లో, బ్లాక్ 1 వద్ద ఈ ప్రమాదం సంభవించింది. ఈ సమాచారం అందిన వెంటనే దాదాపు 30 అగ్నిమాపక శకటాలతో సిబ్బంది సంఘటనా స్థలానికి చేరుకున్నారు. ఢిల్లీ ఫైర్ సర్వీసెస్ చీఫ్ అతుల్ గార్గ్ ఇచ్చిన ట్వీట్‌లో, సెంట్రల్ మార్కెట్లోని ఓ బట్టల దుకాణంలో ప్రమాదం జరిగినట్లు తెలిపారు.
మొత్తం 30 అగ్ని మాపక శకటాలతో మంటలను ఆర్పుతున్నట్లు తెలిపారు. ప్రాణనష్టం జరిగినట్లు ఇప్పటి వరకు సమాచారం లేదని తెలిపారు. ఈ ప్రమాదంలో నాలుగు దుకాణాలు తీవ్రంగా దెబ్బతిన్నట్లు తెలుస్తోంది. మంటలు భారీగా చెలరేగడంతో పెద్ద ఎత్తున పొగ, ధూళి మేఘాలు వ్యాపించాయి. ఆ ప్రాంతమంతా దట్టమైన పొగ వ్యాపించింది.