Uttar pradesh: షాకింగ్ వీడియో..కరోనాతో చ‌నిపోయిన మృత‌దేహాన్ని బ్రిడ్జిపై నుంచి న‌దిలో పడేసిన ఓ వ్యక్తి, యూపీలో బ్రిడ్జిపై నుంచి వెళ్తున్న వ్య‌క్తులు తీసిన వీడియో వైరల్, వారిపై చర్యలు తీసుకుంటామని తెలిపిన పోలీసులు

పీపీఈ కిట్ వేసుకున్న ఓ వ్య‌క్తి కరోనాతో చ‌నిపోయిన మృత‌దేహాన్ని బ్రిడ్జిపై నుంచి న‌దిలోకి ప‌డేస్తున్న వీడియో ఇప్పుడు సోషల్ మీడియాలో వైర‌ల్‌గా మారింది. ఇప్ప‌టికే ఆ రాష్ట్రంలో గంగ‌, య‌మున న‌దుల్లో వంద‌ల సంఖ్య‌లో శ‌వాలు తేలుతూ క‌నిపిస్తున్న త‌రుణంలో ఈ వీడియో ఇప్పుడు సోషల్ మీడియాని షేక్ చేస్తోంది. వర్షం పడుతుండగా ప‌ట్ట‌ప‌గ‌లు, బ్రిడ్డిపై వాహ‌నాలు తిరుగుతున్న స‌మ‌యంలోనే ఆ వ్యక్తి మ‌రొక‌రి సాయంతో ఇలా మృత‌దేహాన్ని న‌దిలోకి ప‌డేయ‌డం షాక్ లాంటిదే. ఈ నెల 28న జరిగిన ఈ ఘ‌ట‌న‌ను ఆ స‌మ‌యంలో బ్రిడ్జిపై నుంచి వెళ్తున్న వ్య‌క్తులు వీడియో తీశారు. అది కొవిడ్ పేషెంట్ మృత‌దేహ‌మేన‌ని బ‌ల్‌రామ్‌పూర్ చీఫ్ మెడిక‌ల్ ఆఫీస‌ర్ బీబీ సింగ్‌ చెప్పారు. ఇప్ప‌టికే బంధువుల‌పై కేసు న‌మోదు చేశారు. వాళ్ల‌పై క‌ఠిన చ‌ర్య‌లు తీసుకుంటామ‌ని ఆయ‌న స్ప‌ష్టం చేశారు.