Pushpak Express Train Accident: పుష్పక్ ఎక్స్ప్రెస్ ప్రమాదంలో విస్తుపోయే నిజాలు, శాపంగా మారిన రూమర్స్, ప్రాణ భయంతో బయటకు దూకి తిరిగిరాని లోకాలకు..
మహారాష్ట్రలో ఘోర రైలు ప్రమాదంలో విస్తుపోయే విషయాలు వెలుగులోకి వస్తున్నాయి. జలగావ్ జిల్లాలో పరండా రైల్వే స్టేషన్ సమీపంలో కర్ణాటక ఎక్స్ ప్రెస్ ఢీకొట్టడంతో ఎనిమిది మంది మృతి చెందారు.అయితే దీనికి కారణం రూమర్స్ అని తెలుస్తోంది.
Jalgaon, Jan 22: మహారాష్ట్రలో ఘోర రైలు ప్రమాదంలో విస్తుపోయే విషయాలు వెలుగులోకి వస్తున్నాయి. జలగావ్ జిల్లాలో పరండా రైల్వే స్టేషన్ సమీపంలో కర్ణాటక ఎక్స్ ప్రెస్ ఢీకొట్టడంతో ఎనిమిది మంది మృతి చెందారు.అయితే దీనికి కారణం రూమర్స్ అని తెలుస్తోంది. పుష్పక్ ఎక్స్ ప్రెస్ ట్రైన్ లో మంటలు చెలరేగాయన్న వదంతులతో ప్రయాణికులు భయాందోళనలకు గురయ్యారు. వెంటనే చైన్ లాగి కిందకు దూకారు. అనంతరం ట్రైన్ దిగి పట్టాలు దాటుతుండగా ఈ సమయంలో ఎదురుగా వస్తున్న కర్ణాటక ఎక్స్ ప్రెస్ రైలును గమనించలేకపోయారు.
దీంతో వేగంగా వచ్చిన బెంగుళూరు ఎక్స్ప్రెస్ ప్రయాణికులపై నుంచి దూసుకుపోయింది. ఈ ఘటనలో ఇప్పటివరకు ఎనిమిది మంది మృతి చెందారు.దీనిపై సమాచారం అందుకున్న రైల్వే అధికారులు వెంటనే స్పందించి, ఘటన స్థలానికి చేరుకుని సహాయక చర్యలు ప్రారంభించారు.మృతుల సంఖ్య మరింతగా పెరిగే అవకాశం కనిపిస్తోంది. పట్టాలపై మృతదేహాలు చెల్లాచెదురుగా పడి ఘటన స్థలం భీతావాహంగా మారింది.క్షతగాత్రుల ఆర్తనాదాలతో భయంకరంగా మారింది. కాగా పుష్పక్ ఎక్స్ప్రెస్ ఒక్కసారిగా బ్రేక్ వేయడంతో నిప్పురవ్వలు చెలరేగగా.. అది చూసి ప్రయాణికులు అగ్ని ప్రమాదం జరిగిందని భావించడంతోనే ఈ విషాదం చోటు చేసుకున్నట్లు తెలుస్తోంది.
Pushpak Train Accident Videos
పుష్పక్ ఎక్స్ప్రెస్ ప్రమాదంపై సెంట్రల్ రైల్వే సీపీఆర్ఓ స్వప్నిల్ నీలా మాట్లాడుతూ, "లక్నో నుండి ఛత్రపతి శివాజీ మహారాజ్ టెర్మినస్ వైపు వస్తున్న జల్గావ్ పుష్పక్ ఎక్స్‌ప్రెస్‌లోని పచోరా సమీపంలో, అలారం గొలుసు లాగడం జరిగింది. ఈ సంఘటన తర్వాత, కొంతమంది ప్రయాణికులు రైలు దిగిపోయారు. అదే సమయంలో కర్ణాటక ఎక్స్ప్రెస్ అక్కడిని దాటుతూ వ్యతిరేక దిశలో వెళుతుండగా, కొంతమంది ప్రయాణికులు ఆ రైలును ఢీకొట్టారని మాకు తెలిసింది.
ప్రాథమిక సమాచారం ప్రకారం, 7-8 మంది ప్రయాణికులు మరణించారని తెలుస్తోంది. వారిని జాగ్రత్తగా చూసుకోవడానికి మేము స్థానిక పరిపాలన సహాయం తీసుకున్నాము. సమీపంలోని ఆసుపత్రుల నుండి కూడా సహాయం కోరాము. రైల్వే ప్రమాద సహాయ వైద్య వ్యాన్ కూడా భూసావల్ నుండి బయలుదేరింది. అది త్వరలో సంఘటనా స్థలానికి చేరుకుంటుంది... కర్ణాటక ఎక్స్ప్రెస్ తన తదుపరి ప్రయాణాన్ని తిరిగి ప్రారంభించింది. గాయపడిన ప్రయాణీకులకు సహాయం అందించిన తర్వాత పుష్పక్ ఎక్స్ప్రెస్ ప్రయాణాన్ని తిరిగి ప్రారంభిస్తుందని తెలిపారు.
ఈ విషాద ఘటనపై మహారాష్ట్ర ముఖ్యమంత్రి దేవేంద్ర ఫడ్నవీస్ స్పందించారు. జల్గావ్ జిల్లాలోని పచోరా సమీపంలో జరిగిన దురదృష్టకర సంఘటనలో కొందరు ప్రాణాలు కోల్పోవడం చాలా బాధాకరం. వారికి నా సంతాపం తెలియజేస్తున్నా. నా సహోద్యోగి మంత్రి గిరీష్ మహాజన్ మరియు పోలీసు సూపరింటెండెంట్ సంఘటన స్థలానికి చేరుకున్నారు. జిల్లా కలెక్టర్ త్వరలో అక్కడికి చేరుకుంటారు.
మొత్తం జిల్లా యంత్రాంగం రైల్వే పరిపాలనతో సమన్వయంతో పనిచేస్తోంది. గాయపడినవారికి చికిత్స కోసం తక్షణ ఏర్పాట్లు చేస్తున్నారు. 8 అంబులెన్స్‌లను పంపించారు. గాయపడిన వారి చికిత్స కోసం జనరల్ ఆసుపత్రితో పాటు సమీపంలోని ఇతర ప్రైవేట్ ఆసుపత్రులను సిద్ధంగా ఉంచారు. గ్లాస్ కట్టర్లు, ఫ్లడ్‌లైట్లు వంటి అత్యవసర పరికరాలను కూడా సిద్ధంగా ఉంచారు. మేము మొత్తం పరిస్థితిని పర్యవేక్షిస్తున్నాము మరియు అవసరమైన అన్ని సహాయం వెంటనే అందిస్తున్నాము. నేను జిల్లా యంత్రాంగంతో సంప్రదిస్తున్నాను." అని మహారాష్ట్ర ముఖ్యమంత్రి దేవేంద్ర ఫడ్నవీస్ ట్వీట్ చేశారు.
ఈ ఘటనపై రైల్వే బోర్డు సమాచార & ప్రచార విభాగం, ఎగ్జిక్యూటివ్ డైరెక్టర్ దిలీప్ కుమార్ మాట్లాడుతూ, "ఇప్పటివరకు అందిన సమాచారం ప్రకారం, 8-10 మంది తీవ్రంగా గాయపడ్డారు. స్థానిక ఆసుపత్రులు, ఇతర ప్రాంతాల నుండి అంబులెన్స్‌లను ఏర్పాటు చేశారు, అవి సంఘటన స్థలానికి చేరుకున్నాయి. గాయపడిన వారిని ఆసుపత్రికి తరలిస్తున్నారు. పుష్పక్ ఎక్స్‌ప్రెస్‌లో కొంతమంది ప్రయాణీకులు అలారం గొలుసును లాగి రైలు దిగిపోయారు. బెంగళూరు-న్యూఢిల్లీ కర్ణాటక ఎక్స్ప్రెస్ అవతలి వైపు నుండి వస్తోంది.
అది ఢీకొనడంతో కొంతమంది ప్రయాణికులకు తీవ్ర గాయాలైనట్లు మాకు సమాచారం అందింది... భూసావల్ నుండి చాలా మంది రైలు ఎక్కారు. వారిలో ఒకరు అలారం గొలుసును లాగారు. ఆ తర్వాత, వారు రైలు దిగి దాటడానికి ప్రయత్నించారు లేదా పట్టాలపై నిలబడి ఉన్నారు. దీని కారణంగా, వారిని రైలు ఢీకొట్టింది. భూసావల్ డివిజనల్ రైల్వే మేనేజర్ సంఘటనా స్థలానికి బయలుదేరారు, వైద్య బృందం అక్కడ ఉంది, స్థానిక నిర్వాహకుడు కూడా అక్కడే ఉన్నారు. రైల్వే సీనియర్ సెక్షన్ ఇంజనీర్ కూడా అక్కడే ఉన్నారు. ఇతర సీనియర్ వైద్యులు మరియు అంబులెన్స్‌లను ఏర్పాటు చేశామని తెలిపారు.
(Social media brings you the latest breaking news, viral news from the world of social media including Twitter, Instagram and YouTube. The above post is embedded directly from the user's social media account. This body of content has not been edited or may not be edited by Latestly staff. Opinions appearing on social media posts and the facts do not reflect the opinions of Latestly, and Latestly assumes no responsibility for the same.)