Bengaluru Doctor Saves Woman: విమానం గాలిలో ఉండగా గుండెపోటుతో కుప్పకూలిన మహిళ, అత్యవసర చికిత్సతో ఆమె ప్రాణాలు కాపాడిన బెంగుళూరు డాక్టర్

Bengaluru Doctor Saves Woman with Cardiac Arrest:  బెంగళూరు నుంచి న్యూఢిల్లీకి బయలుదేరిన ఇండిగో ఎయిర్‌లైన్స్ విమానంలో బుధవారం ఆందోళనకర వాతావరణం నెలకొంది. విమానం గాలిలో ఉండగా ఓ వృద్ధురాలు గుండెపోటుకు గురైంది. ఈ సమయంలో విమానంలో ఉన్న ఓ వైద్యుడు మహిళకు ప్రాథమిక చికిత్స అందించారు. విమానం ఢిల్లీలో ల్యాండ్ అయిన వెంటనే మహిళను ఆస్పత్రికి తరలించారు. అదృష్టవశాత్తూ, ఆమె ఆరోగ్యం మెరుగుపడింది. ప్రాథమిక చికిత్స అందించి తన ప్రాణాలను కాపాడిన వైద్యులకు మహిళ బంధువులు కృతజ్ఞతలు తెలిపారు.

ఇండిగో విమానం 6E869 బుధవారం మధ్యాహ్నం 12 గంటలకు బెంగళూరులోని కెంపెగౌడ అంతర్జాతీయ విమానాశ్రయం నుంచి ఢిల్లీకి బయలుదేరింది. విమానంలో ప్రయాణిస్తున్న 60 ఏళ్ల రోసమ్మ ఢిల్లీకి చేరుకునేలోపే అస్వస్థతకు గురైంది. ఆ మహిళకు శ్వాస తీసుకోవడంలో ఇబ్బంది ఏర్పడి గుండెపోటు వచ్చింది. ఈ సమయంలో విమాన సిబ్బంది విమానంలో ప్రయాణిస్తున్న డాక్టర్‌ను సంప్రదించారు.

గుండెపోటు అంటే ఏమిటీ, లక్షణాలు ఎలా ఉంటాయి, అస్పిరిన్ మాత్ర హార్ట్ ఎటాక్‌ ను నియంత్రించగలుగుతుందా, గుండెపోటు వస్తే ఏం చేయాలో తెలుసుకోండి

అదృష్టవశాత్తూ ఈ విమానంలో గణేష్ అనే వైద్యుడు ప్రయాణిస్తున్నాడు. అతను ప్రాథమికంగా ఆర్థోపెడిక్ సర్జన్. అతను బెంగుళూరులోని జలహళ్లిలోని CANS మల్టీ స్పెషాలిటీ హాస్పిటల్‌లో పనిచేస్తున్నాడు. వెంటనే డాక్టర్‌ ఆ మహిళకు ప్రథమ చికిత్స అందించాడు.టైమ్స్ ఆఫ్ ఇండియాతో మాట్లాడిన వైద్యుడు గణేష్.. ‘‘నేను కొన్ని వ్యక్తిగత పనుల నిమిత్తం ఢిల్లీ వెళ్తున్నాను. ఈ సమయంలో విమానంలో డాక్టర్ కోసం కాల్ వచ్చింది. విమానంలో ప్రకటన వెలువడిన వెంటనే, నేను వృద్ధురాలికి సహాయం చేసాను. ఆమె విమానంలోనే కుప్పకూలిపోయింది. ఆమె పల్స్ బలహీనంగా ఉంది. ఆమెకు గుండెపోటు వచ్చి ఉంటుందని అనుమానించి ప్రథమ చికిత్స చేశానని వివరించాడు.

మహిళకు ప్రథమ చికిత్సగా సీపీఆర్‌ను అందించారు. అంటే నోటి ద్వారా ఆమె ఊపిరితిత్తులను గాలితో నింపి ఛాతీ భాగాన్ని నొక్కడం ద్వారా ఊపిరితిత్తులను, గుండెను పునరుద్ధరించే ప్రక్రియను చేపట్టారు. ఈ ప్రాథమిక చికిత్సకు మహిళ బాగా స్పందించింది. ఆ మహిళ తన సోదరి పక్కనే కూర్చున్న ప్రయాణికుడిపై పడటంతో అందరూ భయాందోళనకు గురయ్యారు. అయితే, ఆమె పరిస్థితి మెరుగుపడింది. ఆమె లేచి కూర్చుంది.

గుండెపోటు వస్తే ఆస్పిరిన్ కాపాడుతుందా, అసలు డాక్టర్లు ఏమంటున్నారు, ప్రముఖ డాక్టర్ యనమదల మురళీ కృష్ణ విశ్లేషణాత్మక కథనం చదవండి

విమానంలో ఉన్న అత్యవసర వైద్య పరికరాలు మంచి స్థితిలో ఉన్నాయి. దీంతో ఆమెకు ప్రాథమిక చికిత్స అందించేందుకు ఉపయోగకరమని డాక్టర్‌ తెలిపారు. సరైన చికిత్స తర్వాత మహిళ పరిస్థితి మెరుగుపడింది. అయితే వెంటనే ఆమెను ఆసుపత్రిలో చేర్చాల్సి వచ్చింది. అందుకే, ఇండిగో విమాన సిబ్బందికి విషయం చెప్పాను. విమాన సిబ్బంది కూడా తగిన విధంగా స్పందించారని డా. గణేష్ అన్నారు. బుధవారం మధ్యాహ్నం 2.35 గంటలకు విమానం ఢిల్లీలో ల్యాండ్ అయిన వెంటనే ఆమెను వెంటనే ఢిల్లీ విమానాశ్రయంలోని మేదాంత మెడికల్ సెంటర్‌కు తరలించారు. తగిన చికిత్స అందించిన తర్వాత మహిళ ఆరోగ్య పరిస్థితి మెరుగుపడింది.