YSRCP Central Office Demolished: తాడేపల్లిలో వైసీపీ కార్యాలయం కూల్చివేత.. ప్రొక్లైన్లు, బుల్డోజర్లతో భవనాన్ని కూల్చివేస్తున్న సీఆర్డీఏ అధికారులు
గుంటూరు జిల్లా తాడేపల్లి మండలం సీతానగరంలో నిర్మాణంలో ఉన్న వైయస్సార్ కాంగ్రెస్ పార్టీ కార్యాలయాన్ని అధికారులు కూల్చివేశారు. తాడేపల్లిలో శనివారం ఉదయం 5:30 గంటల సమయంలో కూల్చివేతలు ప్రారంభించారు.
Vijayawada, June 22: గుంటూరు (Guntur) జిల్లా తాడేపల్లి మండలం సీతానగరంలో నిర్మాణంలో ఉన్న వైయస్సార్ కాంగ్రెస్ పార్టీ కార్యాలయాన్ని (YSRCP Central Office) అధికారులు కూల్చివేశారు (Demolished). తాడేపల్లిలో శనివారం ఉదయం 5:30 గంటల సమయంలో కూల్చివేతలు ప్రారంభించారు. ప్రొక్లైన్లు, బుల్డోజర్లతో భవనం కూల్చివేశారు. శ్లాబ్ వేయడానికి సిద్ధంగా ఉన్న భవనాన్ని కోల్చివేశారు. బోట్ యార్డుగా ఉపయోగిస్తున్న స్థలాన్ని తక్కువ లీజుతో వైసీపీ కార్యాలయం కోసం అప్పటి జగన్ సర్కార్ కట్టబెట్టిందంటూ సీఆర్డీఏ అధికారులు ఆరోపించారు. ఈ అక్రమ నిర్మాణంపై వైసీపీకి సీఆర్డీఏ నోటీసులు జారీ చేసింది. దీన్ని సవాల్ చేస్తూ హైకోర్టును శుక్రవారం వైసీపీ ఆశ్రయించింది.
మళ్లీ కోర్టుకు వెళ్తామన్న వైసీపీ
విచారణ జరిపిన న్యాయస్థానం చట్టాన్ని మీరి వ్యవహరించవద్దని ఇరువురికీ సూచించింది. ఈ క్రమంలోనే శనివారం ఉదయం అధికారులు కూల్చివేతలు చేపట్టారు. అయితే, హైకోర్టు ఆదేశాలను బేఖాతరు చేస్తూ కార్యాలయ భవనాన్ని కూల్చివేశారంటూ వైసీపీ నేతలు నిరసనలకు దిగారు. కూటమి ప్రభుత్వం కోర్టు ధిక్కరణకు పాల్పడిందని.. ఈ విషయాన్ని హైకోర్టు దృష్టికి తీసుకెళ్తామన్నారు.