Idgah Maidan (Photo Credit- PTI)

Bengaluru, August 31: వివాదాస్పద ప్రదేశంలో గణేశ్ ఉ త్సవ వేడుకలను అనుమతించరాదని సుప్రీంకోర్టు ఆదేశించిన నేపథ్యంలో కర్ణాటక పోలీసులు బుధవారం బెంగళూరులోని ఈద్గా మైదాన్ ప్రాంగణంలో (Idgah Maidan in Bengaluru) సుమారు 1,500 మంది పోలీసులను (Police Fortress) మోహరించారు.సిబ్బందిలో 21 మంది ఏసీపీలు, 47 మంది ఇన్‌స్పెక్టర్లు, 130 మంది సబ్ ఇన్‌స్పెక్టర్లు, 126 మంది అసిస్టెంట్ సబ్ ఇన్‌స్పెక్టర్లు, 900 మంది కానిస్టేబుళ్లు డీసీపీల పర్యవేక్షణలో ఉంటారు.

ఎలాంటి అవాంఛనీయ సంఘటనలు జరగకుండా ర్యాపిడ్ యాక్షన్ ఫోర్స్ (RAF) 120 మంది సిబ్బంది, 100 మంది ప్రత్యేక మందుగుండు సామగ్రి నిపుణుల బృందం, కర్ణాటక రాష్ట్ర రిజర్వ్ పోలీస్ (KSRP) యొక్క 10 ప్లాటూన్‌లను కూడా ఉంచారు. 'యథాతథ స్థితి' సుప్రీంకోర్టు ఆదేశాలతో రేపు బెంగళూరులోని ఈద్గా మైదానంలో గణేష్ చతుర్థి వేడుకలు ఉండవు. పోలీసులు ఇప్పటికే ఆ ప్రాంతంలో రౌడీ ఎలిమెంట్స్‌ను అదుపులోకి తీసుకున్నారు మరియు ఫ్లాగ్ మార్చ్‌లు మరియు మత పెద్దలతో వరుస సమావేశాలు కూడా నిర్వహించారు.

కర్ణాటక ప్రభుత్వానికి సుప్రీంకోర్టు షాక్, ఈద్గా మైదాన్‌లో గణేష్ చతుర్థి ఉత్సవాలపై స్టేటస్ కో విధించిన అత్యున్నత న్యాయస్థానం, యథాతథ స్థితి కొనసాగించాలని ఉత్తర్వులు

కాగా, గణేశ్ ఉత్సవాలు (Ganesh Chaturthi Celebrations) జరుపుకునేందుకు అనుమతించాలని అధికారులను కోరుతూ న్యాయపోరాటం చేస్తున్న చామరాజనగర్ సిటిజన్స్ ఫోరం.. సుప్రీంకోర్టు ఆదేశాల మేరకు నడుచుకుంటామని ప్రకటించింది. హిందూ సంస్థలు ఈ ఆదేశాన్ని పాటించాలని నిర్ణయించుకున్నాయి. ఈ సందర్భంగా ఫోరం అధ్యక్షుడు రామే గౌడ మాట్లాడుతూ.. న్యాయపోరాటం కొనసాగిస్తుందని, రానున్న రోజుల్లో విజయం సాధించడం ఖాయమని, అనంతరం ఈద్గా మైదానంలో గణేశోత్సవాన్ని ఘనంగా నిర్వహిస్తామని తెలిపారు.

ఇదిలా ఉంటే కర్ణాటక హైకోర్టు సంచలన తీర్పు వెలువరించింది. హుబ్బళ్లి-ధర్వాడ్‌లో ఉన్న ఈద్గా (Eidgah) మైదానంలో గణేశ్‌ చతుర్థి ఉత్సవాలకు అనుమతించింది. ఈమేరకు మంగళవారం అర్ధరాత్రి తీర్పును వెలువరించింది. నవరాత్రి వేడుకలు ప్రణాళికాబద్ధంగా నిర్వహించాలని సూచించింది. ఎలాంటి అవాంఛనీయ ఘటనలు చోటుచేసుకోకుండా చూసుకోవాలని అధికారులను ఆదేశించింది.

హుబ్బళ్లీ ఈద్గా మైదానంలో గణేశుని వేడుకలు నిర్వహించడానికి నగర మున్సిపల్‌ కమిషనర్‌ అనుమతించారు. దీనికి వ్యతిరేకంగా అంజుమన్‌ ఈ ఇస్లామ్‌ సంస్థ హైకోర్టుకు వెళ్లింది. దీనిపై విచారణ చేపట్టిన జస్టిస్‌ అశోక్‌ ఎస్‌ కినాగి.. ఈద్గా ఆస్తి ధార్వాడ్ మున్సిపాలిటీకి చెందిందని, అంజుమన్-ఏ-ఇస్లాం సంవత్సరానికి ఒక్క రూపాయి రుసుముతో 999 సంవత్సరాల కాలానికి లీజుదారుగా మాత్రమే ఉందని పేర్కొన్నారు.

ప్రభుత్వ స్థలంలో వినాయకుని వేడుకలు అనుమతిస్తూ.. పిటిషన్‌ను తిరస్కరించారు. కాగా, బెంగళూరు ఈద్గా మైదానంలో వినాయక చవితి వేడుకలు నిర్వహించవద్దని సుప్రీంకోర్టు ఆదేశించిన విషయం తెలిసిందే.కాగా, ఈద్గా మైదానంలో ఉత్సవాలకు హైకోర్టు అనుమతించడంతో నిర్వాహకులు గణేశుడని ప్రతిష్టించారు. తెల్లవారుజామునే ఘనంగా తొలిరోజు పూజలు నిర్వహించారు. మరోవైపు ఎలాంటి అవాంచనీయ ఘటనలు చోటుచేసుకోకుండా భారీగా పోలీసులను మోహరించారు.